SI Gobernador Gwendolyn Garcia nipasalig nga maresolbar ang isyu sa 93-1 sa di pa mapupos ang iyang termino karong 2013.

Gihimo ni Garcia ang pasalig atubangan sa mga benepisaryo sa 93-1 nga katapusang ningdawat sa nahibiling 244 ka deeds of absolute sale nga gikan sa Kapitolyo.

Sa maong gidaghanon, 95 ka mga benepisaryo ang gikan sa Barrio Luz; 54 sa Brgy. Lahug; 23 sa Brgy. Apas; 19 sa Brgy. Capitol Site; 17 sa Brgy. Camputhaw; 12 sa Brgy. Mabolo; 12 sa Brgy. Busay; pito sa Brgy. Kalunasan ug lima sa Brgy. Lorega.

Ang seremonyas gipahigayon sa Capitol Social Hall alas 2 sa hapon kagahapon nga gitambungan mismo ni Department of Interior and Local Government (DILG) Secretary Jesse Robredo, DILG-7 Director Pedro Noval, Provincial Board Member Alex Binghay, chairman sa Committee on Properties sa Hunta Probinsyal sa Sugbo ug ubang mga opisyal sa lalawigan sa Sugbo.

Ningtambong usab sa kalihukan sila si kanhi Brgy. Luz Kapitan ug karon Cebu City Councilor Nida Cabrera, Lahug Brgy. Kapitan Mary Ann de los Santos, Capitol Site Brgy. Kapitan Manuel Guanzon ug Barrio Luz Kapitan Rian Tante.

Si Garcia nanghinaot nga pinaagi sa pag-interbinir ni Robredo mahatagan og solusyon ang isyu sa 93-1 sa di pa matapos ang iyang termino labi na sa kapin 1, 400 ka mga okopante nga napakyas pagtuman sa ilang obligasyon sa Kapitolyo.

“We seek to find a win-win solution. A solution that I can see thru the coming intervention of Robredo,” matud pa ni Garcia.

Si Robredo sa iyang bahin nagkanayon nga paningkamutan niya nga masulbad ang isyu sa 93-1 labi na sa mga okopante sa AFP Central Command diha sa Brgy. Apas, siyudad sa Sugbo.

Sumala pa niini nga karon ang tukmang panahon aron masolusyonan ang problema diin kinahanglan usab nga magsakripisyo ang mga okopante pinaagi sa pagbayad sa ilang obligasyon sa Kapitolyo.

“Naniniwala ako pag hinahanap ng isang bukas na isipan at puso, makakahanap tayo ng solusyon. People must see walang benepisyo pag walang sakripisyo,” sumala pa ni Robredo.

Sa bahin sa mga benepisaryo nga nakadawat sa nahibiling 244 ka deeds of sale, sila mapasalamaton tungod kay gituman sa gobernador ang iyang saad kanila nga hatagan og deed of sale kon hingpit nang makabayad sa ilang obligasyon sa Kapitolyo. (SCG)