NAHUKMAN sa committee nga nagpreparar sa umaabot nga kapistahan sa dakbayan sa Lapu-Lapu nga wa nay Miss Gay nga pagabuhaton karong tuiga.
Ang kagamhanan sa dakbayan sa Lapu-Lapu nakaandam na sa ilang mga kalihukan sa ilang kasaulogan sa kapistahan ubos sa patron sa Berhin sa Regla.
Si Bise Mayor Marcial Ycong nipahibawo nga naandam na ang tanan ug usa sa ilang dakong kalihukan mao ang fluvial parade nga salmotan sa di mominus 50 ka mga sakyanan sa kadagatan.
Si kanhi konsehal Damian Gomez, chairman sa Tourism Commission, niingon nga ang maong kalihukan siyam na ka tuig nilang gihimo nga sugdan sa usa ka santos nga misa.
Samtang sama sa gihapon kadtong pumpboat nga labing nindot ang dekorasyon makadawat og pahalipay.
Usa usab sa makadapit unyag pagtagad sa mga local ug international tourist mao unya ang Tourism Nite nga salmotan unya sa 24 ka mga dakong hotel ug restaurant sa dakbayan sa Lapu-Lapu. Ipahigayon kini karong Nobyembre 15.
Apan ang Miss Gay nga kanunay na nilang gihimo matag tuig ilang nahukman nga karong tuiga ila nang wagtangon ug ilang ipuli mao ang Mr. Lapu-Lapu.
Si Gomez niingon nga adunay panawagan nga adunay kausaban sa mga presenstasyon nga ilang himuon ug usa sa ilang nahukman nga wagtangon ang Miss Gay.
Matod ni Gomez nga di kini sabton nga wa sila makauyon sa mga mahuyang apan mas maayong wala nalay Miss Gay sanglit kanunay man kining gisupak sa simbahan sa higayon nga mopahigayon sila.