Barangay kapitan naghikog

PADAYON pa nga gisuta sa kapolisan kung wala bay foul play sa kamatayon sa usa ka barangay kapitan nga giingong naghikog patay didto sa Barangay Ninoy, lungsod sa Kalilangan, Bukidnon.

Giila ang biktima nga mao si Martin Villaflor ug kasamtangang kapitan sa maong barangay kinsa magpapili unta sa umaabot nga eleksyon karong petsa 25 ning bulan.

Sa report nga nakuha sa Sun.Star Superbalita gikan sa Bukidnon Police Office nasayran nga nagpusil sa iyang kaugalingon ang biktima niadtong Huwebes mga alas 3:00 sa hapon sulod mismo sa puloy-anan niini.

Ang mga sakop sa pamilya nagtuo nga gusto gyod hunoson sa kapitan ang iyang kaugalingong kinabuhi labina nga daan na kini nag-ingon nga nagproblema pag-ayo asa pangitaon ang pundo sa iyang kandidatura.

Nasayran nga kontra sa biktima sa umaabot nga piliay ang iya ra usab uyoan.

Matud sa mga polis nga posibleng nagsagol ang problema sa biktima ug nagsakit ang ulo sa pag huna-huna nga dili lamang mabahin ang paryente sa umaabot nga eleksyon, wala na usab kini kwarta nga ikasuporta sa iyang kandidatura.

Girespondehan sa kapolisan sa Kalilangan Police Station ang insidente apan padayon pa nga gisuta kung wala bay foul play sa kamatayon niini.

Kini labina sa mga huhungihong nga adunay mga gikaaway sa nilabay nga panahon.

Kahinumduman nga usa ka barangay kapitan ang gipusil sa mga rebeldeng grupo niadtong nilabayng semana sa Bukidnon. (Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph