USA ka lalaki ang nakabsan sa iyang kinabuhi human gi-hit and run niadtong Huwebes mga alas 10:00 sa gabii sa lungsod sa Jasaan, Misamis Oriental.

Ang biktima nailhan lamang sa ngalan nga Jonathan, lumad nga taga Bukidnon.

Gidala sa Northern Mindanao Medical Center (NMMC) ning siyudad sa Cagayan de Oro ang biktima apan pipila ka oras ang nilabay nakabsan sa iyang kinabuhi.

Matud sa personahe sa NMMC nga nahinabi sa Sun.Star Superbalita nga usa lamang ka driver sa elf truck ang nakakita sa biktima nga nagbuy-od sa dalan hinungdan nga iyang gikarga ug gidala sa tambalanan.

Nakita ang biktima nagbuy-od ug nagkadugo uban sa motorsiklong gisakyan. Samaran ang ulo sa biktima.

Samtang ang kapolisan sa Jasaan Police Station nibutyag nga wala silay natala nga aksidente sa dalan nilabayng gabii ug nanawagan kining itaho kanila aron maimbestigahan kung kinsa man ang mibangga sa biktima.

Sa pagsulat ning balita kasamtangan pang gipanawagan ang pamilya sa biktima aron mailhan ang pangalan niini ug apelyido.

Natigayong kuhaon sa usa ka punerarya ning siyudad ang biktima ning panahona. (Stephanie V. Berganio)