USA ka konduktor sa dyip ang namatay sa diha nga gipusil sa mga wala mailhing lalaki sa alas 5:00 sa hapon niadtong Biyernes didto sa probinsiya sa Cotabato.
Nailhan sa kapulisan ang biktima nga si Sammy Tandol, 46, minyo ug molupyo sa Malaybalay, Bukidnon.
Sa nahagpat nga taho gikan sa PNP-Armm regional office, manaug na unta ang biktima sa iyang gikondukturan nga depasaherong sakyanan gikan sa Banisilan Cotabato, apan pag-abot nila sa utlanan sa Wao, Lanao del Sur dunay mipara nga duha ka wala mailhing pasahero.
Kalit lamang nga usa kanila ang mihulbot sa dala nga kalibre .45 nga pistola ug gipusil si Tandol.
Patay on-the-spot ang konduktor nga naigo sa iyang ulo ug likod nga bahin sa lawas.
Samtang ang mga mamumuno dali nga misibat paingon sa wala matino nga direksyon.
Gikanayon ni Efren Tamayo, paryente sa bikima, nga sa wala pa mahitabo ang insidente dunay gikalalis ang biktima nga pasahero sa gikonduktoran nga dyip nga kuwang og plite.
Ang kapulisan padayong nag-imbestiga sa maong hitabo aron mailhan ug madakpan ang mga suspetsado. (Edgardo Fuerzas)