DUHA ka mga kandidato pagka-barangay kagawad ang gipatay didto sa Barangay Asbang, sakop sa lungsod sa Matanao, Davao del Sur.

Ang duha gipatay atol sa gihimong panagtigum sa mga kandidato sa ilang dapit.

Ang unang biktima nailhan nga si Antonio Dominguez, 45, minyo ug incumbent barangay kagawad sa maong lugar.

Ang suspek naila sab nga si Fernando Minggong, 46, minyo, usa ka ex-convict ug barangay tanod sa mao gihapong lugar.

Nahitabo ang insidente banda alas 3 sa hapon samtang nagsaulog ang Barangay Asbang sa ilang ika-38 nga anibersaryo dungan sa pagpahigayon og tigum sa mga kandidato aron iyagyag ang ilang mga plataporma de gobyerno.

Subay sa taho, samtang gihimo ang open forum sa mga kandidato, nibiya si Dominguez sa gymnasium ug miadto sa panimalay ni Cerelo Ydimne aron badlungon ang mga tawong nagkanta sa videokehan nga kusog kaayo.

Apan naitok ang suspek nga miresulta sa init nga komprontasyon.

Wa damha, mikuha diay og kutsilyo ang suspek dayon gihansakan ang kagawad.

Si Police Officer 3 Raymus Alabata, nag-imbestiga sa nahitabo, nagkanayon nga ang biktima nahiagom og mga samad dinunggaban sa dughan ug ubol-ubol.

Gisuwayan pa kini pagdala sa Medical Center of Digos Cooperative (MCDC) sa siyudad sa Digos apan pipila ka minuto nakutluan ra sab kini sa kinabuhi.

Gilayong nisibat ang suspetsadong barangay tanod human sa insidente.

Samtang bandang alas 4:45 ang takna sa hapon sa maong adlaw, laing insidente sa pagpangluba ang nahitabo sa mao gihapong lugar sa atubangan mismo sa balay ni Francisco Naren.

Ang biktima giilang si Katong Minggong, 72, minyo, nagpapili pagka-barangay kagawad sa maong lugar.

Ang suspek giila sa kapulisan nga mao si Rodrigo Jr. (apilyedo gipugngan kay 15 anyos) ug molupyo gihapon sa nasampit nga lugar.

Ang batang menor gihulagway nga ig-agaw ni Kagawad Dominguez, kinsa armado og kutsilyo niadtong higayona.

Wa na matabang ang biktimang si Minggong gumikan patay gilayon siya sa dihang giluba.

Ang 15 anyos gilayong nitahan sa iyang kaugalingon ngadto ni Sgt. Velasco sa detachment sa 72nd Infantry Battalion nga nakabase sa silingang Barangay Asinan. Gitunol sab dayon sa mga sundalo ang suspek ngadto sa Matanao Police Station.

Panimalos maoy nakitang motibo kon nganong gipatay si Minggong, kinsa ig agaw sa barangay tanod.

Narekober sa kapulisan ang duha ka kutsilyo nga adunay 8 ug 17 pulgadas ang gitas-on nga gigamit pagluba kang Dominguez samtang laing 13 pulgadas sab nga kutsilyo ang ilang narekober nga matud pa maoy gigamit pagpatay kang Minggong.

Gihan-ay na sa kapulisan ang pagduso og tukmang kaso batok sa mga suspek. (Orlando B. Dinoy)