USA ka talagsaong lumba sa mountain bike ang ipahigayon unya sa Oktubre 30, 2010 dinhi sa dakbayan sa Sugbo.

Lahi sa ubang lumba sa mouintain bike nga abilidad ug kusog lang ang gikinahanglan aron pagdaog, niining lumbaa gikinahanglan sab ang pasensya ug disiplina kay sagol kini mountain biking ug pagkompleto og mga tahas.

Ang lumba nga gipasiugdahan sa Cebu Extreme Bikers’ Union (CEBU) Inc. bukas alang sa tanang mountain biker nga way limit sa edad.

"The Manny Pacquiao Blog". Click here for stories and updates on the Filipino boxing champ.

Anha kini ipahigayon sa Lower Busay, Brgy. Busay, dakbayan sa Sugbo.

“Tasks are simple and are either directly or indirectly related with mountain biking,” matod sa Cebu Extreme, organizer niining lumba.

Ang lumbaanan sagol cross country, pagkatkat, rock garden, subida, grabeng dulhugon ug dunay ambakunon nga dapit.

Hinuon mamahimo sab nga di molayat ang biker.

Apan alang sa mga hardtail nga biseklita, tungod kay duna silay bentaha batok sa mga full-suspension frame, mas taas sila og rota.

Hatagan og pass ang matag biker nga makakompleto sa matag tahas.

Kon di siya makahuman o buot nga moagi sa tahas, hatagan siyag time penalty o silot pinaagi sa pagdugang sa iyang oras sa paghuman sa lumba.

Gikinahanglan gyud hinuon nga ang matag biker paspas nga mohuman sa mga tahas aron siya makadaog sa lumba.

Ang unang lima nga finisher sa lumba maoy makaapil sa second run nga wa na kinahanglana pa ang paghimo sa mga tahas lahi sa unang hugna. Busa, ang oras i-reset ngadto sa zero.

Mga premyo mao ang:

1st - P5,000.00 + medal;

2nd - P3,000.00 + medal;

3rd - P1,000.00 + medal;

4th - P500.00 + medal;

5th - P300.00 + medal.

Ang tanang finishers makadawat og certificates

Ang lumba dunay P150 nga registration fee nga dunay libreng t-shirt alang sa unang 50 ka registrants.

Mahimong makaparehistro sa Citi Avenue Bike Shop sa dan Manalili, dakbayan sa Sugbo.

Ang onsite registration cut-off alas 7:30 sa buntag sa adlaw sa lumba.

Duna say contest sa best in action photo. Busa kadtong mga photography enthusiast gidasig sa pagkuhag mga hulagway.

Ang modaog maka-premyo og P1,000 plus certificate. Ang top 10 makadawat sab og certificates.

Matod sa Cebu Extreme, bukas ang venue karong Oktubre 23 alang sa ganahan nga mo-praktis apan sirhan pagkasunod adlaw hangtod na sa adlaw sa lumba.