NAGPADANAGAT og makuyaw nga mensahe ngadto kang pound-for-pound champion Manny Pacquiao ang upat ka mga sparring partners ni Mexican Antonio Margarito.
Sa online edition sa The Ring Magazine, ang giingong bibliya sa boksing, nagkausa sa pag-ingon sila si Cleotis Pendarvis, Ricardo Williams, Austin Tour ug KC Martinez nga delikado gyud kaayo si Pacquiao sa pagpakigharong niini kang Margarito karong Nobiyembre 13 sa Dallas Cowboys Stadium.
“He’s definitely not (a) shot (fighter),” matod ni Pendarvis, kinsa nagtabang sab sa preparasyon nila ni Oscar De La Hoya ug Ricky Hatton batok kang Pacquiao.
“If he was shot, he wouldn’t have been able to do what he did today. He did 10 rounds with four talented young sparring partners. We’re not old journeymen that he can beat up on. We can fight.”
Si Williams, 2000 Sydney Olympics silver medalist, nagkanayon nga bilib gyud kaayo siya sa kalig-on ni Margarito.
Ang sumosulbong nga si Trout, kinsa adunay 21-0, 13KOs nga rekord, nagkanayon nga dako gyud kaayo og kalambuan ang inawayan ni Margarito kumpara niadtong nag-sparring sila niadtong 2008.
Kabahin sa estilo ni Margarito nga kusog gyud kaayong moataki, gipasabot ni Trout nga grabe gyud kaayo kini’g epekto.
“You start to feel it by the second round. It’s real,” pagtino ni Trout.
Gani mismong si Top Rank boss Bob Arum miasoy nga kinahanglan gyung dugangan pa ni Pacquiao ang iyang preparasyon kay puwerte gyud ka delikado ang hatod ni Margarito.
“He better step up his training because this guy (Margarito) poses very, very unique dangers,” Arum dihang giinterbyu sa ABS-CBN sa paghiabot gyud niini kagahapon dinhi sa nasod.
Tungod sa iyang kabalaka, mianhi gyud si Arum sa nasod aron susihon ang preparasyon ni Pacquiao ug pahimangnuan ang Pinoy boxing superstar nga dili gyud mokompiyansa bisa’g gamay.