Nalzaro: Mga alalay sa panimay

ANG mga helpers o alalay sa panimay dako kaayo og papel sa usa ka pamilya. Kasagaran sa mga misulod ug helper mao adtong taga probensiya nga dili makasarang sa pag-eskuwela o wala gani maka-eskuwela gumikan sa kawad-on. Kadaghanan taga probensiya nga nanimpalad sa siyudad. O mga gi-recruit sa mga kabanay aron manarbaho sa siyudad.

Ang uban nga amo mga salbahis kaayo kay ilang gitratar nga morag iro ang ilang mga helpers. Gamay ra ang suweldo, daghan pa og trabaho. Dunay mga all around diha, laba, plantsa, luto, limpyo sa panimay. Ang uban himuon pang yaya. Unya dili pakan-on og maayo kay ang biya nga sud-an sa amo nga pan-os na gani ang ipakaon. Maayo pay iro kay maayo pang kaon. Unya dili hatagan og day off aron makasuroy-suroy ang mga helpers. Dagmalan pa gyod. Nakadungog siguro mo nga adunay mga amo nga mopasakit sa ilang mga helpers.

BALAODNON

Adunay gisang-at karon nga balaudnon sa usa ka partylist group nga maghatag og insaktong suweldo ug benepisyo sa mga helper. Base sa maong balaodnon, didto sa kauluhan gikinahanglan na nga magsuwedo ang mga helper og P3 mil kada buwan. Sa mga highly urbanized city sama dinhi sa Cebu, P2,500 ug P2,000 sa gagmay’ng mga siyudad. Unya hatagan pa og 13th month pay, balig usa ka buwan nga suweldo.

Una niini, duna poy laing balaudnon nga nagmando nga hatagan og Social Security System (SSS) benefits ang mga helpers. Kon mapasar man kining maong mga balaodnon, makatabang kini og dako sa mga alalay sa panimay. At least man lang, mahatagan sila og gamay nga alibyo sa ilang kinita-an nga diin ang uban mihatag pa intawon sa ilang mga ginikanan ngadto sa probensiya. Busa kamo nga mga amo, ayuha intawon og tratar kanang inyong mga helper. Isipa nga tipik ug kabahin na sila sa inyong pamilya.

TIGLAWOG SA IRO

Adunay usa ka taga probensiya nga gustong magpa-boy sa siyudad. Mi-aplay siya sa usa ka adunahang intsik nga daghan og dagkong iro. Tuod man, gidawat dayon siya. Gihatagan siya og assignment nga tiglawog sa iro. Mi-ingon ang Insek, ikaw lawog iro. Kada buntag ikaw pakaon ka hotdog, corned beef, itlok, ham ako mga iro’.  Mi-ingon ang aplikante; ‘Nyor, dili na lang ko mo-aplay og boy Nyor’. Tubag ang Insek, ‘unsa man diay imo aplayan?’ Mi-ingon ang aplikante; ‘aplay na lang ko pagka-iro, Nyor’.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph