MAAYONG adlaw sa tanan! Nakahinumdom pa ba kamo nako? Ang inyong kanhing Chikadora, nia na karon sa laing nasud, ang United Arab Emirates (UAE) ug nanarbaho sa usa ka insurance brokerage firm. Usa ka dakong butang alang kanako ang kahigayunan nga subling makasuwat sa SuperBalita.Dakong pasalamat ang akoang ipaabot sa amoang managing editor, Ely Luciano, tungod niini.

Ang inyong higala, anaa na sa Abu Dhabi City ilawom sa Emirata (Emirate) sa Abu Dhabi sud na sa kapin tulo ka buwan. Ang Abu Dhabi, duha ka oras ang gilay-on gikan sa mas nailhang Emirata (ug siyudad) sa Dubai.

Ang akoang lindog, nagtumong aron nga mahibaw-an sa atoang mga kahigalaan ang kinabuhi sa mga gibansagang "Bagong Bayani" nga mao ang mga Overseas Filipino Workers (OFW) nga wa'y laing tinguha gawas sa palambuon ang kinabuhi sa ilang tagsa-tagsa ka mga pamilya. Pinaagi sa akoang mga pagpadayag, masayran sa tanan kung "lami" ba o "pait" ang kinabuhi sa abroad.

Hinuon, una ang mga bug-at nga mga hisgutanan, ako sa kamong pakisayran sa dapit nga akoang nahimutangan.

Ang UAE, usa ka grupo sa mga Emirata sa Arabian Peninsula sa Habagatang-Kasadpang bahin sa Persian Gulf. Tupad niini ang mga nasud Oman ug Saudi Arabia ug nakigbahin sa katubigan sa Iraq, Kuwait, Bahrain, Qatar ug Iran. Ang UAE, may pito ka estado (emirata) nga mao ang Abu Dhabi, Dubai, Sharjah, Ajman, Umm al-Quwain, Ras al-Khaimah ug Fujairah. Ang Abu Dhabi nga mao ang ikaduhang labing dakong siyudad sa nasud ug giilang capital city. Adunahan nga nasud tungod sa ilang dakong reserba sa lana.

Klima

Tungod kay nahimutang sa Tungang-Sidlakan (Middle East) ang UAE, uga ug init ang panahon sa kinatibuk-an. Labing init nga mga buwan mao ang Hulyo ug Agosto nga may average maximum temperature nga 48 °C. Sa akoang ka-demalas, naabot ko niining dapita, buwan sa Hulyo. Kung summer, gawas sa kainit, makaluya sab ang hilabihang kainit sa hangin. Lisod i-ginhawa. Magsugod sab ang "winter" ning dapita sa Nobyembre hangtud sa mga mosunod nga tulo o upat ka buwan. Niining panahona, di ka sab makabaktas kung di doblehon ang imong jacket. Pait lang, wa'y snow. Katugnaw lang ang imo.

Mga Nanimuyo

Ning tuiga sumala sa wikipedia.com, gibana-bana nga miabot na ngadto sa 8.19 ka milyon ang populasyon sa UAE. Sa maong gidaghanon, 20 porsiyento lamang niini ang UAE nationals o Emiratis samtang 80 porsiyento niini ang ang mga gikan sa laing nasud nga gitawag og expatriates.Labing daghan sa mga "expats" diin 1.75 ka milyon ang mga Indian nationals, 1.25 ka milyon ang Pakistanis ug 600,000 ang Bangladeshis. Anaa sa ikaupat sa labing daghan ang mga Pilipino, gisundan sa Iranian ug mga taga-Sri Lanka.

Relihiyon

Ang Islam mao "official religion" sa UAE apan gihatagan og kagawasan ang ubang relihiyon sama sa Kristiyanismo, Hinduismo, Buddhismo ug uban pa. Sukwahi sa ubang mga Arab nations, ang Abu Dhabi, nagtahod sa katungod sa katawhan. Labaw'ng gawasnon ka dinhi itandi sa ubang silingang nasud sama sa Saudi Arabia.

Kultura

Sagad sa mga Emirati (lokal) sa UAE nagsuot og kandura ug ang mga babaye nagsul-ot og abaya nga kolor itom. Apan bisan pa man sa ka-konserbatibo sa mga bisti sa mga lokal ning nasura, ang gitawag nga "Western-style clothing" ang labaw'ng popular tungod sab sa mas daghang expats nga nanimuyo. Ang mga Pilipino pananglitan, makasul-ob sa bisting ilang buot suoton sa kondisyon nga di kini law-ay tan-awon. Sa Dubai, ning bag-ohay lamang, gidili ang pagsul-ob sa mga mubong palda ug mga laylay mga mga sanina diin makita ang dughan sa mga malls aron nga di kini makatandog sa ka-sensitibo sa mga konserbatibong lokal sa nasud.

Sa sunod, hisgutan nato ang kinabuhi sa mga Pinoy dinhi. Hangtud sa sunod. Kitakits. I love you all, God bless and mwaaahhh!