KAPIN 150 ka mga kandidato ang mitambong sa gihimong "peace covenant" nga gipangulohan sa Commission on Elections (Comelec), Davao City Police Office (DCPO), Task Force (TF) Davao ug 69th Infantry Battalion didto sa distrito sa Buhangin siyudad sa Davao niadtong Sabado.

Mitambong sa "peace covenant" mao ang mga kandidato sa pagka-barangay kapitan, barangay kagawad, Sangguniang Kabataan (SK) chairman ug SK kagawad gikan sa mga barangay Buhangin Proper, Waan, Callawa, Tigatto, Mandug, Acacia, Indangan ug Cabantian.

Ang maong aktibidad gihimo aron magpinirmahay ang tanang kandidato nga tumanon ang balaod sa Comelec ug himuong malinawon ang umaabot nga barangay elections karong Oktubre 25.

Mga dinapit nga bisita sa peace covenant mao sila second district election officer Atty. John Paul Cubero, DCPO director Police Senior Superintendent Rene Aspera, TF Davao chief Colonel Leonardo Rey Guerrero, ug 69th IB commander Lieutenant Colonel Aniano Orap-orap.

Ang nahisgutang mga opisyal mihatag sa ilang mensahe ngadto sa mga kandidato bahin sa pagkamahinungdanon sa kahusay ug kalinaw sa umaabot nga eleksiyon.

Mga kandidato inspirado kaayo sa mensahe sa nahisgutang mga opisyal ug misaad nga di gayud mohimo og mga kasamok samtang sila nangampanya sa ilang tagsa-tagsa ka mga barangay.

Ang maong kalihukan gisugdan sa alas 9:00 sa buntag hangtud alas 11:00 sa buntag.

Sa laing bahin, subling nanawagan ang Comelec ngadto sa tanang kandidato nga sundon ang common poster area ug ilang hipuson ang mga poster human sa eleksyon karong Oktubre 25.

Ang panawagan gikan kang First District election officer Atty. Danilo Cullo bahin sa nagkadaghan nga poster sa bisan asang dapit sa siyudad sa Davao.

Tungod sa nagkadaghan nga political propaganda, andam sab ang City Environment and Natural Resources Office (Cenro) nga motabang sa Comelec sa paghipus sa mga political propaganda nga gibitay gawas sa common poster area ilabi na sa punoan sa kahoy.

"Andam mi motabang," ni Cenro officer-in-charge Atty. Joseph Felizarta dihang gihinabi sa mga tigbalita. (AD)