USA ka lalaki gigulgolan og liog ug napatay sa iyang kaaway tungod sa selos didto sa Barangay Kaligutan, lungsod sa Laak, Comval Province, Biyernes sa gabii.
Nailhan ang biktima nga mao si Marejun Cesar, 38, ug molupyo sa Purok 3, Barangay Kaligutan.
Sa report gikan sa Comval Province Police Provincial Office, nasayran nga pasado alas 6:00 sa gabii nag-inom ang biktima sa usa ka tindahan nga gipanag-iyahan sa usa ka Bartolome Nene didto sa maong lugar uban ang usa ka Daniel Laurejas.
Samtang nagkig-istorya ang biktima sa tindera sa maong tindahan, kalit lamang mibutho ang suspek nga nailhan nga si Ramel Lape, 20, ug molupyo sa maong dapit, ug sa way paglangan, iyang gigolgol ang liog sa biktima gamit ang kutsilyong pangmatada.
Namatay diha-diha dayon ang biktima tungod sa grabeng samad nga nahiaguman.
Ang suspek abtik dayong misibat padulong sa wa matino nga lugar human sa hitabo.
Naligo na sa iyang kaugalingong dugo ug halos maputol ang liog sa biktima sa dihang naabtan sa mga otoridad.
Sa gihimong pakisusi sa biktima, gituohang selos ang nakitang motibo sa krimen.
Kapulisan sa lungsod sa Laak mihimo na og dugang imbistigasyon sa maong hitabo, samtang kasong murder gihikay na batok sa suspek. (Marvin Pineda)