USA ka lalaki ang nasikop na sab tungod sa election gun ban dinhi sa probinsya sa Davao del Sur.

Kini maoy ikatulong suspek nga nasikop sukad gihugtan ang pagpatuman sa gun ban.

Si Protacio Masamloc alyas Boffy, nagpuyo sa Barangay Saub, lungsod sa Matanao, Davao del Sur, nadakpan sa kapulisan human nidayo didto sa Barangay Cogon, lungsod sa Kiblawan, Davao del Sur.

Si Police Senior Inspector Ferdinand Casiano, hepe sa Kiblawan police, nagkanayon nga nakadawat sila og taho gikan sa mga opisyal sa barangay nga adunay tawong nihimo og kagubot sa lugar.

Sa ilang pagtubag sa alarma, naabtan nila ang suspek nga nagbitbit pa og paltik nga shotgun, nagbaton og serial number 86127, adunay usa ka magazine nga gisudlan og 7 ka mga buhing bala sa mao nga armas.

Wa maglangan ang kapulisan sa pag-kustudiya sa suspek sanglit lig-on ang ilang ebedensya nga nakalapas gyud kini sa Omnibus Election Code ug Republic Act 8294 o mas naila nga illegal possesion of firearms. (Dondon Dinoy)