PATAY ang 31 anyos nga lalaki human gipusil sa wala mailang lalaki niadtong Sabado, mga alas 9:30 sa gabii sa Chavez-Rizal St., ning siyudad sa Cagayan de Oro.

Giila ang namatay nga mao si Arante Musal, adunay, kapuyo, taga Carmen ning siyudad kinsa napuno sab og patik ang kalawasan.

Si Senior Police Officer 3 Roberto Cambi sa Police Station 1 (PS1) sa Divisoria nga nahinabi sa Sun.Star Superbalita niingon nga magsige og tambay sa maong dapit si Musal tungod kay usa man kini ka dispatser sa dyip ug namaligya sa daplin sa dalan ang kapuyo niini.

Matud ni Cambi nga sa ilang inisyal nga imbestigasyon nasayran nga ang suspetsado unang namatikdan nga nagpalit pa og mani sa usa ka sidewalk vendor ug nangutana pa sa tindero ug gipangita ang dispatser.

Paglakaw sa suspetsado nga edaran na, nagsul-ob og jacket nga itom, nagkalo, sakto lang ang panglawas nadungog na dayon ang kusog nga buto sa pistola pipila ka metro ang kalay-on.

Human sa pagpamusil yano lang nga nisakay sa motorsiklo ang suspetsado ug nisibat.

Nakitang nagkadugo ug nagbuy-od ang biktima, samaran og duha ang dughan niini samtang usa sa likod nga bahin.

Gidala pa sa Northern Mindanao Medical Center (NMMC) apan dead on arrival nga gideklarar sa mga doctor.

Matud ni Cambi nga wala pa silay nakita nga motibo sa pagpangluthang labina nga ang asawa hugtanong niingon nga maayo ug buotan ang iyang kapuyo.

Padayon pa usab nga gisuta sa kapolisan ang background sa biktima labina sa mga patik niini sa kalawasan.

Mitumaw usab ang tahong love triangle ang motibo sa pagpangluthang.

Sa kasamtangan gidala na sa puloy-anan niini ang patayng lawas sa biktima. (Stephanie V. Berganio)