HUMAN sa taastaas nga panahon nga pagkampanya sa Amerika partikyular sa Las Vegas, mibalik si Mark Jason Melligen dinhi sa Sugbo aron ipakita pagbalik sa mga Sugbuanon ang iyang kapabilidad.
Karong Oktubre 30, mopakita’g aksyon ang gitawag og “Mighty Mark” sa undercard sa “Pinoy Pride” boxing promotion sa Waterfront Hotel sa Lahug, Cebu City.
Sa promosyon, nga gipasiugdahan sa ALA Promotions ug television giant ABS-CBN, ikaharong ni Melligen ang sama niyang knockout artist nga si Mexican Bladimir “The Blade” Hernandez nga modugang og kolor sa panagribal sa mga Pinoy ug Mexicano ibabaw sa ring.
Si Melligen, kinsa nagkampanya sa welterweight division, adunay 19-2, 13KOs nga rekord samtang si Hernandez adunay 18-3, 16KOs nga baraha.
Sa unom niya ka mga away sa Las Vegas, kausa ra gyud napilde si Melligen batok kang Mexican Michel Rosales pinaagi sa split decision.
Nahitabo kini sa undercard sa panagharong nila ni Z “The Dream” Gorres ug Luis Melendez diin diriyot nakalas ang kinabuhi ni Gorres.
Gipabuhagay ni Melligen, kansang mga promoter mao ang ALA Promotions ug Top Rank Promotions, nga naghinamhinam na sab gyud siya nga moaway pagbalik dinhi sa Sugbo.
Lisod gyud nga tahas alang kang Melligen ang pagpakigbatok kang Hernandez, kinsa nakakontra na’g mga dekalidad sa iyang division.
Lakip sa mga gikaharong na ni Hernandez mao sila si WBC no. 11 Michael Medina, Canadian boxing sensation David Lemieux, ug Jose Luis Cruz, kinsa nakaaway na sab nila ni Joshua Clottey, Shane Mosley ug Carlos Baldomir.