PAGKAMAOT paminawon ang giila nga non-partisan nga matang sa eleksyon labaw pa man hinuon sa traditional nga matang sa pamolitika ang gipakitang labok sa mga kandidato sa umaabot nga Barangay ug SK elections.

Di makaon sa iro ang uban nilang ataki batok sa ilang mga kaatbang. Bisan ang mga personal nga butang ilang gihisgutan ug gilantugi-an. Ang mga incumbent nga buot magpasubli pagka kapitan, naputos sa mga pasangil, kay ang gihunahuna sa kuntra dakong bentaha alang kaniya ang pagpakauwaw sa kuntra nga kapitan. Gipaabot na nako ning daan bisan niadtong wa pa ang kampanya.

Diha nay daghan ang niduol kanako kay mangayo og kopya sa video diin nalambigit sa anomaliya ang ilang kuntrang kapitan. Nangutana ko kung unsaon nila, gamiton daw sa kampanya. Pero way nahitabo sa ilang gihangyo kay ang polisiya sa ABSCBN way video nga mogawas kong way kamanduan gikan sa korte. Sa ato pa, kong gipaundayonan sila sa ilang gusto mosamot pa siguro ka init ang dagan sa kampanya.

BASIHANAN

May igo bang basihanan kining mga ataki labot sa mga anomaliya nga gipahid ngadto sa mga kandidato nga incumbent. Maka konbenser ba ni og mga botanti? Makapadaug ba ni nila? Depende na ni sa mga namasangil pagmatuod nga ang ilang gingalngal tinuod.

Pero kung pasangil lang ni nga migawas sa media o komentaryo sa radyo, di pa ni matawag nga sad-an na gyud kadtong gipasanginlan. Sa ato pa ubos sa landong sa demokrasya ang korte o ba kaha ang ombudsman ray dunay gahom pagsulti nga kining kapitana o konsehala sad-an sa kasong pagpangawkaw. Mentras tanto nga wa pay kaso nga napasaka o hukom nga giluwatan pabilin kini silang inosente sa kasong pangurakot, di ba?

Mao nga kamong namasangil angayan lang nga magpas-an og ebedensya di kay motungtung mo sa entablado dayong putak-putak nga kurakot ang inyong kuntra unya wa diay mo’y ebedensya. Kamo sab nga mga botanti ayaw sab dayon mo og tuo anang ilang mga isyu.

Kinahanglan nga magsusi susi sab mo o ba kaha ipatubag sa hingtungdan aron malamdagan mo. Kini nga punto maoy akong gikahadlokan. Kay kong magsigi kining mga ataki layo ray eleksyon duna na’y mohay-ad nga kinabuhi diha sa karsada. Akong buot ipasabot, kong di makadawat ang usa ka piliunon sa grabing ataki basin makahunahuna siya pagbawos pinaagi sa dugoon nga paagi. Ug wa masayop ang PNP ug Comelec pagpasidaan nga bantayanan kaayo kining eleksyon sa barangay og SK kay tungod sa grabing linabanay sa mga supporter og sa ka sensitibo sa matag kampo sa dagan sa kampanya basin bala o di balota ang sagupon nila.