USA ka lalaki nga naligsan og sakyanan ug namatay padayon pang giila sa kapulisan.
Sumala sa Digos City Police Office, nga usa ka kotseng Honda City, kolor pula, nagbaton sa plakang LGG-228, narehistro sa usa ka nagpangan og Emma Ferenal ug gimaneho ni Jovesito Ferenal, taga dalang Sinsuat, siyudad sa Kidapawan maoy nakaligis sa biktima.
Si SPO3 Felicisimo Putong, nag-imbestigar sa kaso, nagsulti nga kusog ang dagan sa kotse apan nikalit pagtabok didto sa Barangay Colorado ang biktima banda alas 6:30 sa gabii, Dominggo, hinungdan nga napunggit sa sakyanan.
Nahiagom ang biktima og grabeng bun-og ug mga pangos sa kalawasan samtang ang ulo niini nabunal sa sementadong kalsada mao nga namatay dayon.
Gihulagway sa kapulisan nga usa ka retarded ang biktima ug gidala didto sa Maharlika Funeral Homes sa dakbayan sa Digos.
Sa laing bahin, nakigpulong na ang Matanao Police Station sa mga kadagkuan sa tribong B'laan aron kapugngan ang "pangayaw" didto sa Barangay Asbang, Matanao, Davao del Sur.
Niulbo ang kasamok sa lugar human gipangluba patay ang duha ka mga kandidato sa pagka-barangay kagawad nga gituohang nagbinaslanay human ilang mga paryente gipangpatay.
Kahinumdoman nga nadamay sab ang usa ka pulis nga si PO2 Manolo Bo-oc nga naigo sa ulo ug nasamdan si barangay tanod Rolando Cerbo human gisulong sa mga suspetsado ang balay sa pamilyang Gabilan ug gipaarakan og mga bala sa armas tungod sa pagkalambigit sa anak niini nga menor sa pagdunggab patay kang Katong Miggong.
Nagsugod ang kasamok sa dihang giluba patay si re-electionist barangay kagawad Antonio Dominguez, 45, ni barangay tanod Fernando Minggong, 46, ug molupyo ra sa maong lugar.
Sumala pa nga gibadlong lang ni Dominguez ang kabanha sa videokehan atol sa anibersaryo sa barangay gumikan kay di na magdungog sa gihimong "political fura."
Apan wa nipatuo si Minggong ug human maglalis, gidunggab niini ang opisyal sa barangay.
Ang pag-umangkon ni Dominguez nga 15 anyos maoy nanimalos pinaagi sa pagluba patay sab sa paryente sa nisibat nga suspek.
Si Katong Minggong, 72, nilansad pagka-barangay kagawad namatay gilayon human nitaop ang kutsilyo sa iyang dughan.
Tungod niini, nangayo og proteksyon sa ilang seguridad ang pamilyang Gabilan sa kapulisan.
Apan wala girespeto ang kapulisan, gisulong sa walo ka mga gituohang paryente sa pamilyang Minggong ang balay ni Gabilan ug gipabothan.
Ang mga suspek nagtagsa og sakay sa walo ka kabayo ug paspas kaayong nakasibat human nibawos pagpabuto ang kapulisan.
Aron di na mosamot ang kagubot sa dapit, nilihok na ang kapulisan sa pakigtigom sa mga lider sa tribo aron motabang pagsumpo nga di na modako ang "Pangayaw".
Si Senior Inspector Charlie Merca, hepe sa kapulisan, maoy nangunay pakighinabi sa matag kampo sa duha ka pamilya aron mahatagan og solusyon ang nahitabo. (Orlando B. Dinoy)