USA ang gitigbas samtang laing duha ang gidunggab patay sa managlahing lugar dinhi sa siyudad sa Davao niadtong Dominggo.

Gitigbas patay mao ang mag-uumang si Arnel Buyog, 35, minyo ug nagpuyo sa Sitio Sto. Niño, Upper Barangay Tamugan, distrito sa Marilog, siyudad sa Davao.

Base sa pasiunang imbestigasyon ni SPO2 Roger Sevillano, ang biktima napalgan nga wa nay kinabuhi nga nagbuy-od sa yuta sa alas 6:00 sa gabii niadtong Dominggo.

Ang kapulisan miresponde sa maong dapit human nakadawat og impormasyon nga dunay gipatay pinaagi sa text message gikan ni Kapitan Emma Relampagos sa Barangay Tamugan.

Si Sevillano nagsulti nga ang biktima dunay dakong samad tinigbasan sa iyang nawong hinungdan sa iyang kamatayon.

Sanglit way nakasaksi sa maong hitabo, gisugdan dayon ang imbestigasyon sa kapulisan ug didto nasayran nga ang suspek mao si Jimboy Gubal, 29, minyo ug nagpuyo sa maong dapit.

Si Gubal giingon nga daling miikyas gikan sa nahitaboan sa krimen ug mitahan sa iyang kaugalingon didto sa Baguio Police Station.

Human mitahan ang suspetsado, gipahibalo sab dayon sa kapulisan sa Baguio Police Station ang kapulisan sa Marilog Police Station aron kuhaon ang suspek.

Nasayran nga nagkaaway ang biktima ug suspetsado tungod kay nasuko ang namatay dihang gitagoan sa suspek ang iyang sundang.

Giandam na karon ang kasong murder sa kapulisan batok sa suspetsado.

Sa laing bahin, gisusi karon sa kapulisan kung unsa ang motibo ug kinsa ang mga mamumuno sa duha ka mga tawo nga gipangdunggab niadtong Dominggo.

Unang gidunggab mao si alyas Jon-Jon, 31, vendor sa Bankerohan Public Market, sigun sa imbestigasyon ni SPO2 Nelson Ladua sa San Pedro Police Station.

Si Ladua nagbutyag nga nahitabo ang pagpanunggab sa alas 7:20 sa gabii didto sa Washington Street, Barangay 38-D Poblacion.

Ang biktima nakaangkon og 18 ka mga samad dinunggaban sa iyang kalawasan hinungdan sa iyang kamatayon.

Nasayran sa imbestigasyon sa kapulisan nga naglakaw ang biktima sa maong lugar apan gisundan siya sa duha ka mga tawo nga nagsakay og motorsiklo.

Ang angkas niini, suma sa mga nakasaksi, maoy mikanaog sa motorsiklo dayon giduslak ang biktima sa makadaghan nga higayon.

Ikaduhang biktima mao si Richard Caña, 19, ulitawo, mekaniko ug nagpuyo sa Purok 1, San Nicolas, Dumalag, Barangay Matina Aplaya, ning siyudad.

Si Caña giingon nga nagpahulay sulod sa ilang balay apan gisulod siya sa tulo ka mga tawo ug didto gitabangan og dunggab hangtud nga namatay.

Ang insidente nahitabo sa alas 11:40 sa gabii, base sa imbestigasyon ni SPO4 Policarpo Ballenas sa Talomo Police Station.

Mga biktima atua karon gihaya sa Angel Funeral Homes samtang gihimo na karon ang makuting imbestigasyon sa kapulisan sa San Pedro ug Talomo Police Station. (AD)