Gilaslasan og 61 porsiyento ang pundo alang sa buhatan ni Bise Gobernador Greg Sanchez alang sa sunod tuig.
Basi sa Programmed Appropriation and Obligation by Object of Expenditure, moabot lang sa P18,146,000 ang pundo nga giaprobahan ni Gob. Gwendolyn Garcia alang sa buhatan ni Sanchez alang sa sunod tuig.
Mas ubos kini sa P45,567,000 nga pundo nga giaprobahan ning tuig 2010 ug P62,498,673.80 niadtong nakalabay’ng tuig.
Sa giaprobahan nga pundo sa Vice Governor’s Office, wa na kini gahini og pundo alang sa suweldo sa mga casual nga mga trabahante ubos sa buhatan ni Sanchez.
Nasayran nga ang Office of the Vice Governor adunay kinatibuk-ang 56 ka mga empleyado diin tulo lang niini ang mga regular ug ang nahibiling 50 kapin pulos na mga casual nga kawani.
Lakip sa wa gahini og pundo ang legislative research and codification project, repair and maintenance of building and other structures, land transport equipment ug legislative assistance fund ni Sanchez.
Maapektuhan usab niini ang dugang bonus ug allowance sa mga empleyado ubos sa Vice Governor’s Office ingon man ang pagkuha og consultants ni Sanchez.
Nunot niini, nipiyait na si Sanchez sa gihimong pagpiit sa gobernador sa pondo nga alang sa iyang buhatan.
Iyang gihulagway ang gibuhat sa gobernador nga act of terrorism ug naghimo sa iyang buhatan nga inutil ug way kapuslanan.
“This is the worst they have done. There is terrorism in my office. I am affected so much that I can,t move anymore,” matod ni Sanchez.
Si Sanchez nanganti nga himuon ang tanan aron mabawi ang tanang gahom nga alang kaniya isip bise gobernador sa lalawigan sa Sugbo.
Sumala niya, siya unta ang adunay katungod nga moandam, mo-review ug mo-approve sa pundo isip pangulo sa Sangguniang Panlalawigan. (SCG)