MGA napiling opisyal sa lungsod sa Compostela nanawagan ni Pedro Noval nga moluwat na kini isip acting mayor sa lungsod.

Si Joel Quino, nidaog nga mayor sa miaging eleksyon uban sa iyang bise mayor ug mga konsehal wa pa makalingkod tungod sa protesta ni kanhi Mayor Ritchie Wagas.

Ang grupo nihulagway ni Noval, director sa Department of Interior and Local Government (DILG-7) 7, nga usa sa suliran sa ilang lungsod.

Si Quino niingon nga si Noval klaro kayong nidapig ni Wagas ug ang presenya niya sa ilang lungsod maoy maghatag og higayon ni Wagas nga makahimog maniubra sa mga dukomento ug anomaliya nga iyang nahimo atol sa iyang administrasyon.

Si Konsehal Tessa Cang niingon nga di angayang manghambog si Noval nga maayo niya pagdumala ang lungsod tungod kay gawas nag ngitngit ang ilang lungsod, nisiaw na usab ang krimen.

Di usab kini makapanghambog nga aduna nay dagkong pundo ang lungsod kay wala man siyay gihimo gawas sa pagpanuweldo sa mga empleyado, pagbayad sa kuryenti ug tubig.

Ilang gihulagway si Noval nga nag-apil-apil sa ilang kalihukan bisan ug dili na kini niya trabaho.

Nidugang ang grupo nga si Noval way pagbati kanila bisan unsa may mahitabo sa ilang lungsod tungod kay dili man kini taga Comopostela.

Si Quino niingon nga aduna na silay gihimong lakang batok niini apan wa lang una kini nila ibutyag.

Samtang, gihagit usab sa grupo ang Commission on Audit (COA) sa paghimo og legal nga lakang tungod sa pagpasagag og gasto sa pundo sa lungsod sa mga miaging opisyal sa pagpangulo ni Wagas.