USA ka amahan nidunggab-patay kaugalingong anak nga naigo sa tiyan ginamit ang usa ka hait nga bangkaw.

Ang krimen nahitabo sa Mangcao Village, Barangay Poblacion 3, dakbayan sa Carcar niadtong Dominggo sa gabii.

Ang biktima mao si Moises Abarquez, 39, buwag sa unang asawa apan may kapuyo karon, dunay usa ka anak ug nagpuyo sa nahisgutang lugar.

Ang iyang amahan nga suspek sa pagpanunggab mao si Loreto Abarquez, 63, maglisod na og lakaw ug sulti human giataki sa high blood pressure, molupyo sa samang dapit.

Nadakpan kini human sa hot pursuit operation dihang nisuway sa pagsibat.

Si SPO1 Joel Pananganan, imbestigador sa Carcar police station nga nahinabi sa Sun.Star Superbalita, niingon nga ang igsuon sa biktima maoy nitaho sa insidenti sa police station.

Matud ni SPO1 Pananganan, gisusi karon sa kapulisan ang taho nga nangabubho usab ang amahan ngadto sa iyang anak nga biktima sa “usa ka relasyon.”

Laing anggulo ang gisunod sa kapulisan bahin sa pagdumot sa amahan ngadto sa iyang anak tungod sa pasangil nga maoy nangawat sa iyang mga improvised nga armas ug wa usab bahini sa halin.

Tungod sa kalagot sa amahan, gibantayan niini nga mahinanok sa pagkatulog ang biktima dihang giduslak niini ang tiyan sa bangkaw.

Gihikay na sa Carcar police station ang kasong parricide nga ipasaka batok sa suspek ug ilang gipaabot na lang ang death certificate sa namatay.

Si PO2 Christopher Mendaros sa Carcar niingon nga ang biktima nakasinggit pa og panabang sa iyang mga anak ug igsuon.