USA ka tinun-an kinsa nagmaneho og motorsiklo ang nabanggaan didto sa lungsod sa Sta. Maria, Davao del Sur.
Subay sa taho sa traffic section sa Sta. Maria Police, nahitabo ang pagkabangga banda alas 6 sa gabii, Lunes, sa gimaneho nga motorsiklo sa usa ka Ronald Rigor, 22, ulitawo, nga kolor itom nga Honda TMX 155 didto sa Digos-Malita national highway.
Ang motor narehistro sa ngan sa amahan sa biktima nga si Wilson, 53, mag-uuma, ug nagpuyo sa Sitio Balangiba, Barangay Basiawan, Sta. Maria.
Gihulagway sa mga nakasaksi nga usa ka close van panel nga kolor puti ang nakadasmag sa drayber ug sa angkas niyang wala pa mailhi nga niresulta sa pagkalimbuwad ug pagkalagpot sa mga nahisgutan sa sementadong dalan.
Ang drayber sa van wa manumbaling nga duna siyay nabanggaan ug misutoy lang og pagpadagan hinungdan nga gipangita sa kapulisan aron nga manubag sa salaod nga nahimo.
Mga biktima gidali pagtabang ug gidala sa Davao del Sur Provincial Hospital aron kadapatan og tambal. (Dondon Dinoy)