GILUTOS karon sa mga sakop sa 39th Infantry Battalion ang grupo ni Roberto Castillote alyas Kumander Inoy/Marvin nga suspek sa pagkasamad sa tulo ka mga sundalo atol sa enkwentro sa Barangay Kapatagan niadtong Sabado.

Si Lieutenant Colonel Oliver Artuz, 39th IB commanding officer, nagmando na sa iyang mga gisakpan nga suhiron ang kabukiran diin nanagan ang mga rebelde.

Gitataw sa 39th IB nga nikagiw padong sa Sitio Tamporong sa maong barangay nga ang pikas nga tampi niini sakop na sa Sitio Balutakay, Barangay Managa, lungsod sa Bansalan, Davao del Sur mao nga alerto na sab ang ilang mga kaubanan.

Sumala pa nga nagpahipi ang mga rebelde sa kabukiran aron pag-atang sa mga kandidato nga mangampanya kay mangilkil.

Ang eleksyon giingong maoy usa nga gihuwat sa mga NPA aron sila mabuhi pinaagi sa revolutionary tax.

Apan hugot nga nagpahimangno si Artuz ngadto kanila sa di paghatag og salapi bugti sa kampanya aron di maanad ang mga rebelde.

Padayon sab nga gitambalan sud sa Southern Philippines Medical Center (SPMC) ang tulo ka mga sundalong nasamdan nga nailhang mao sila si Private First Class (Pfc) Wilmon Degorio, Pfc Welino dela Cruz, ug Pfc Glenn Basinilio human maigo sa pagbinayloay og mga bala.

Ang tulo ka mga sundalo sakop sa Alpha Company sa 39th IB kinsa maoy nagpatrolya sa Sitio Libudon, Barangay Kapatagan gikan Biyernes sa hapon.

Nanaghap sab ang militar nga adunay mga menor de edad nga kauban ang mga rebelde sanglit ang mga underwear nga narekober nila sa mga gamit, gihulagway nga pulos gagmay ug masul-ob lamang sa nag-edad gikan 14 ngadto sa 15 anyos.

Daghang mga basiyong bala sa M-16 riffle ang nakuha sa kasundaluhan ingon man mga gun powder ug medisina sa lugar diin nahitabo ang panagtakos.

Karong hapit na ang eleksyon, gipaningkamutan sa 39th IB nga mapahugtan pagbantay ang tanang parte sa lalawigan pinaagi sa anti-insurgency campaign aron di makahimo og kasamok ang mga rebeldeng NPA. (Dondon Dinoy)