USA ka moderno ug kompletong disaster operation center ang gikatakdang mugnaon sa Compostela Valley Province aron magamit panahon sa kalamidad.
Atol sa regular session sa mga sakop sa Sanguniang Panlalawigan niadtong miaging adlaw, pormal nga giabrobahan sa konseho ang giplano ni Governor Arthuro "Chiongkee" Uy nga usa ka disaster operation center.
Ang resolution may kalabutan sa maong plano giduso ni Board Member Ruwel Peter Gonzaga.
Matud ni Gonzaga nga ang maong center kompleto og mga modernong himan ug mga kagamitan nga magamit panahon sa emerhensiya ug uban pa.
Dugang sab ni Gonzaga nga milangkub sab niini ang mga rescue vehicle nga kompleto sab sa mga rescue equipment ug mga communication equipment.
Giplano sa probinsya ang maong proyekto human ang Comval Province maoy sagad mabiktima sa kalamidad sama sa pagbaha ug pagdahili sa yuta.
Pinaagi niining plano, masiguro ang kaluwasan sa mga molupyo sa nahisgutang lalawigan. (Marvin Pineda)