ANG Police Regional Office (PRO) sa Davao nagmando karon nga susihon ang motibo sa papusil patay sa usa ka kandidato pagka-barangay kagawad didto sa Barangay Indangan, distrito sa Buhangin, siyudad sa Davao niadtong Dominggo.

Ang memorandum nagkanayon nga kinahanglan nga sutaon sa kapulisan kung "election-related incident" ang kamatayon sa negusyanteng si Ariel Tolibas, 41, minyo ug nagpuyo sa Kilometro 12, Blessful Family Village, Barangay Indangan.

Sigun sa pasiunang imbestigasyon, nahitabo ang pagpusil sa biktima sa alas 9:30 sa gabii samtang naglingkod lamang ang biktima sa bangko sa RJ Store didto sa Indangan Proper.

Si Tolibas kalit giduol sa usa ka tawo dayon gipusil ang tumong sa ulo, hinungdan sa iyang kamatayon.

Human sa hitabo, daling mibiya ang mamumuno gikan sa crime scene dayon misakay sa usa ka DT 125 Yamaha nga motorsiklo paingon ngadto sa Buhangin Proper.

Tungod niini, gitukod dayon sa Buhangin Police Station ang Task Force (TF) Tolibas nga gipangulohan ni Police Senior Inspector Ruben Francisco.

Ang TF Tolibas maoy gitahasan nga motugkad sa tinuod nga hinungdan nganong gipatay ang biktima.

Si Police Superintendent Antonio Rivera, hepe sa Investigation Detection and Management Branch sa Davao City Police Office, nagbutyag nga personal nga bangi ang motibo sa mga mamumuno nganong ilang gipatay si Tolibas.

"Posibleng personal grudge ang motive ng mga suspects," ni Rivera sa mga tigbalita.

Si Tolibas maoy unang kandidato dinhi sa siyudad sa Davao ang gipatay sa wa mailhing mamumuno samtang nagpadayon ang kampanya sa umaabot nga barangay elections. (AD)