WA magsibli ang anting-anting sa usa ka ex-convict dihang gipusil sa mga pulis nga miaresto kaniya sa alas 6:30 sa gabii niadtong Lunes.

Namatay mao si Edward Engay, hamtong ang pangidaron ug nagpuyo sa Purok Kawayan, Barangay Wines, distrito sa Baguio, siyudad sa Davao.

Base sa spot report sa Baguio Police Station, ang namatay gitakdang sikupon sa mga pulis pinaagi sa gahum sa warrant of arrest nga dunay criminal case number 66, 457-09 nga gipaguwa ni Judge Virginia Europa sa Regional Trial Court 11.

Mga pulis nga gipangulohan ni Police Senior Inspector Reynaldo Capute maoy unang nakasiplat sa namatay nga nagtan-aw og pasundagay sa telebisyon sud sa balay ni Lita Capiones didto sa Purok Kawayan.

Si Engay kinsa nakamatikod sab sa paghiabot sa mga pulis, daling miambak sa koral ug dihang mitugpa na siya sa yuta kalit niyang gikuha ang usa ka granada aron ilabay ngadto sa mga pulis.

Samtang wa pa maibot sa namatay ang safety pin sa granada, gipusil nalang siya sa mga pulis aron di na siya makahimo pa og laing krimen.

Maayong pagkatusak-tusak sa lawas sa namatay dihang gibanatan siya sa mga pulis nga miresulta sa iyang kamatayon.

Ang namatay gibantog sa ilang lugar nga dunay anting-anting apan wa siya naluwas niini dihang mitaop ang mga bala sa armas sa iyang lawas.

Mga sakop sa Scene of the Crime Operatives (Soco), kinsa miresponde sa crime scene, nakahipus og usa ka granada, .22 caliber revolver nga dunay siyam ka mga bala ug tulo ka garapa sa anting-anting nga gipanag-iyahan sa namatay.

Si Engay dunay pending warrant of arrest sa kasong homicide didto sa Baguio Police Station ug kasong murder didto sa Marilog Police Station.

Ang iyang patay'ng lawas atua karon gihaya sa Angel Funeral Homes. (Alger Dura)