MIPRANKA si Top Rank boss Bob Arum nga basi sa iyang obserbasyon, mihinay ang lihok ni pound-for-pound champion Manny Pacquiao.

Giangkon ni Arum nga nabalaka gyud siya ug kon ipahigayon karon ang away, hayan segurado gyung mapilde si Pacquiao batok kang Mexican Antonio Margarito.

Mao kini ang gipamahayag ni Arum human siya misaksi ni Pacquiao nga nakig-sparring sulod sa siyam ka rounds niadtong Sabado.

“When I watched him on Saturday, I didn’t see the kind of speed that he would need to beat Margarito,” matod ni Arum sa artikulo nga nakuha sa associated content.

“If the fight happened on Saturday, Margarito would win the fight.”

Gitataw ni Arum nga nahugno gyud siya sa iyang nakita samtang nakig-sparring si Pacquiao nila ni Glen Tapia ug Michael Medina.

“The old (Manny Pacquiao) is too fast, too talented to get beaten by Margarito. But this (Manny Pacquiao) is not going to be enough,” dugang ni Arum.

Wala man tuod niya giklaro apan basi sa iyang gipanulti, nagtuo si Arum nga wala gyud nikayod og maayo si Pacquiao sa pagpangandam niini.

“Manny’s success is based largely on hard work and focus. He’s skillfull and he has a lot of attributes, but without the hard work, it’s not gonna be there,” matod sa bantugang promoter.

Usa na sab ka buwan ang training camp ni Pacquiao sa Baguio City apan pipila na sab ka higayon nga nabalda ang preparasyon niini kay mobiyahe man kini sa Manila aron tumanon ang mga obligasyon niini isip kongresista sa Sarangani.

Aduna say adlaw nga wala naka-jogging si Pacquiao kay naluya kini sa pagduwa og basketball pagkagabii niadtong higayuna.

Unya aduna say adlaw nga wala kini nakaensayo tungod sa sinusitis.

Hinuon gipasabot ni Arum nga aduna pa’y igong higayon si Pacquiao aron mahingpit ang kondisyon niini.

“Absolutely, he has plenty of time to get into shape and be the old Manny Pacquiao,” batbat ni Arum.

“He’s got plenty of time back in Los Angeles to work on his skills and get ready for the fight.”

Sulod ning semanaha, si Pacquiao mobiyahe na paingon sa Los Angeles aron adto na sa Wildcard gym ni Freddie Roach ipadayon ang hugot nga preparasyon niini.