Efren B. Lonzon

Mata sa Agila

INAY tubagon ug ipasabot ang isyu nga may kalambigitan sa iyang pagkapriso tungod sa kasong libelo, nangatake na hinuon sa mga sakop sa media si Jun Ariego, blocktimer sa dyRF ug dyDD.

Iyang personal nga giatake si Mitchelle Palaubsanon, ang reporter sa Freeman, ako ug si Julius Regner, ang marketing manager ug komentarista nga iya mismong kauban sa dyDD.

Gikasuko ni Ariego ang pagsuwat ni Palaubsanon sa balita mahitungod sa pagdakop sa pulis ngadto kaniya ug ang pagka priso niini. Nasuko sab siya nako kay mikomentaryo ko sa isyu sa hitabo ug samtang iyang gikasab-an sa kahanginan (on air) si Regner gumikan sa pagduda nga konsabo ni Board Member Teddy Ouano.

Laktod pagkasulti ,wa siya makasabot sa tinuoray nga trabaho sa media. Kay ang iyang pagka media, gisagulan man ug komedya. Kun si Board Member Ouano pay pasultion, mahubsan man gani ang atabay.

Kini nakapahinumdum nako sa diskurso ni Kongressman Jun Alcover sa Anad partylist, atol sa pagtapos sa Broadcasters Month sa miaging buwan. Nasuko si Ariego nga wa hatagi og inasal mao nga iyang giatake sa Bantay Radyo ang kongresista.

Pait, kun maoy magdaghan, ug busa manglimpyo nata ug di magpataka ug dawat.

Sa akong nahibaw-an, station-produced ang programa ni Ariego, gibutangan lang kini og pasidaan o pahibawo “ang programa nga inyong madungog binayran ug way labot ang estasyon.” Kini wa magpasabot nga gi-tolerate sa estasyon ang mga tinonto ni Ariego.

Kay ako nasayud nga responsable ang kadagkoan sa Bantay Radyo.

KOMENTARISTA UG POLITIKO

Di palang dugay giataki ni Areglo ang tanang newspaper nga gibayran sa mga relihiyon nga kontra sa Katoliko. Kini tungod sa iyang paglaban ni Talisay City Mayor Soc Fernandez sa mga isyu ug kontrobersya niini sa sinagop nga si Joavan.

Unsa may labot sa media sa pagka Catholic defender sa mayor? Ug unsa may koneksyon sa laing relihiyon aron bayran ang media? Ang isyu ang mga binoang ni Joavan ug ang kanunay nga pagdupa ni Soc.

Mayor Soc, Mayor Jonas Cortes ug uban pa, hinuktuki ang nahitabo ni Board Member Ouano nga kanhi mayor sa Mandaue. Kay gipul-an na’g hatag og kuwarta sa pagpangayo ni Ariego giatake. Kay bakak man ang gihimo sa komentarista napriso sa kasong libelo.

Sa ato pa, di paghatag sa iyang gipangayo nga kuwarta ang solusyon kun di ang pagpasaka og kasong libelo, di paghatag ug pag-sponsor og radio program nga maoy himoong tulay sa iyang panguwarta.

Efren_lonzon@yahoo.com/09084171222