Mga abogado sa Kapitolyo nangandam na sa kasong civil nga ipasaka sa korte batok sa kagamhanan sa syudad sa Sugbo ug sa City Traffic Operations Management (Citom) labot sa gisakmit nga trailer nga iya sa kagamhanan sa lalawigan sa Sugbo.
Si Atty. Rory Jon Sepulveda, Capitol Consultant on Information and revenue generation nitug-an sa mga tigbalita atol sa gipahigayong press conference kagahapon nga I-file ang kaso inig balik ni Gobernador Gwendolyn Garcia sa Sugbo gikan sa iyang biyahe sa China.
Sumala pa ni Sepulveda nga mopasaka ug kaso ang Kapitolyo aron pagbawi sa trailer nga gisakmit sa Citom human giingong giparada sa dapit nga may nakabutang nga No Stopping Anytime.
Siya nagkanayon nga kinahanglan mopasaka na sila og kaso sa korte aron maresolbar ang isyu kun sayop ba o dili ang pagguroy ug pagsakmit sa Citom sa trailer nga nakaparada sa luna nga gipanag-iya sa lalawigan apan nahimutang sa syudad sa Sugbo.
Si Sepulveda midugang nga ila kini’ng buhaton sanglit wala pay desisyon ang Visayas Ombudsman sa kasong kriminal ug administratiba nga una nilang gipasaka batok sa mga opisyal sa kagamhanan sa syudad sa Sugbo ug Citom human sa insidente.
Atol sa sesyon sa Hunta Probinsyal sa Sugbo niadtong Lunes sa hapon, gi-aprobahan sa mga bokal ang resolusyon nga gisang-at ni Provincial Board Member Alex Binghay, chairman sa Committee on provincial and municipal properties nga magtugot sa gobernador nga mopasaka og kaso batok sa kagamhanan sa syudad sa Sugbo, sa city mayor ug Arnel Tancinco, executive director sa Citom aron mabawi ang trailer nga gisakmit niadtong Mayo niining tuiga.
Subling gipadayag ni Sepulveda nga posibleng nanimawos lang ang syudad human gi-hold sa kapolisan sa lungsod sa Barili ang walo ka mga Kaohsiung buses nga iya sa dakbayan sa Sugbo niadtong Abril tungod sa pagbiyahe nga way plate number ug registration papers. Sheila C. Gravinez