DILI mamahimong stamping pad ang Konseho ning dakbayan sa Dabaw sukwahi sa mga espekulasyon sa pipila ka mga tawo ilabina sa mga kritiko sa kasamtangang administrasyon.

Kini maoy hugtanong gitin-aw ni Konsehal Melchor "Boy" Quitain atol sa tulumanong "Gikan Sa Masa Para Sa Masa" (GMPM) kaniadtong Oktubre 17 nga edisyon diin ako mao ang nag-anchor.

Sanglit pribadong programa kining Pinobre edition sa GMPM ni Bise Mayor Rody Duterte, apan gihatagan niya og higayon nga makalingkod sa maong programa aron makapadayag kini sa mga balita nga sulod sa Konseho.

Matud ni Quitain nga ang mga nahitabo karon sa Konseho base lamang kon unsay angay nilang himuon nga nag-agad sa ilang mga huna-huna ug katakus punting sa pagpangalagad niini sa katawhan.

Giisplikar ni Quitain nga ang mga bangi nila batok sa ehekutibo mipakita lang nga dunay himsog nga gitawag og "check and balance" sa lokal nga kagamhanan.

Hugot usab kaayo nga nagpahimangno kanila si Besi Mayor Rody sa tanang miyembre nga dili gayud pugngan ang ilang mga katakus nga magpadayag ug mapagawas ang ilang mga bulawanong talento alang sa kaayohan sa siyudad ug sa katawhan.

Kung unsay dili angay kinahanglan babagan, apan hangtud nga anaa pa sa estado pagkarasyonal ang atong mga pinili nga mga opisyal, paningkamutan kuno gayud nila nga mabalanse ang ehekutibo ug legislatiba minus away.

Gani wala kitay nadunggan nga negatibong reaksiyon gikan sa mga konsehal sanglit gi-adlipan ni Mayor Inday ang mga annual development fund sa mga konsehal gikan sa P3 milyones ngadto sa P2 milyones matag tuig ug wala makalusot dinhi ang buhatan sa vice mayor kay gikan sa P9 milyones ngadto na lang sa P6 milyones.

Matud ni Quitain nga, "the mayor knows best."

Alang sa imong sugyot ug komentaryo sulat lang sa amcorphil.leo@gmail.com. Paminawa ko sa dxRD commando 711 matag alas 6:00-8:00 sa buntag, Lunes hangtud Sabado.