DUHA ka mga motorsiklo ang dungan nga nabalentong human nagbangga didto sa lungsod sa Padada, Davao del Sur.
Gawas sa mga drayber, ang mga motorsiklo pulos dunay mga angkas.
Ang unang motorsiklo usa ka Kawasaki Fury 125, nagbaton sa plaka numero LT 9836 ug narehistro sa ngan ni Armelin Carreon apan gimaneho sa usa ka Gerardo Sardido, 46, minyo ug empleyado sa Padada-Kiblawan Municipal Circuit Trial Court ug nagpuyo sa Rizal Extension, Almendras District sa Padada.
Gi-angkas ni Sardido ang iyang 21 anyos nga anak nga si Prince ug Jenny Romagus, 18.
Ang ikaduhang motorsiklo, usa ka Yamaha Crypton, dunay plate number MN 2117, gimaneho ni Jezrel Go, hingkod ang pangedaron ug taga Doña Aurora, siyudad sa Digos.
Nag-angkas kaniya ang duha ka mga menor nga anak nga mao sila si Jareel, 9, ug Marielle.
Si Police Officer 2 Danny Mualong, kinsa maoy nag-imbestiga, misulti nga banda alas 10:30 ang takna sa miaging gabii parehong nagdagan ang duha ka motorsiklo gikan sa amihanan padung sa habagatang bahin sa maong lugar.
Apan sa dihang ang Kawasaki nga motor niliko sa tuong bahin sa dalan aron nga magpatubil sa Petron Gasoline Station, wala mabantayi sa drayber nga ang Yamaha nga motor mibangga kaniya. Hinungdan sa pagkalagpot sa duha ka mga drayber ug ang ilang mga angkas.
Nakahiagum og daghang mga samad ug pangos sa kalawasan ang mga biktima ug gidala gilayon sa Davao del Sur Provincial Hospital (DDSPH).
Hinuon, ang kapulisan sa maong dapit padayon pa sa ilang gihimong imbestigasyon. (Dondon Dinoy)