TULO ka mga tawo angol human nagbangga ang usa ka motorsiklo ug biseklita didto sa Purok 11-C, Barangay Maniki, lungsod sa Kapalong, Davao del Norte, Lunes sa gabii.

Mga biktima nailhan nga mao sila si Joseph Pentaca, hamtung ang panuigon, molupyo sa Purok 10-C, Barangay Maniki, Vicente Saramosing, ug si Cerela Melijor, pulos molupyo sa susamang dapit.

Sa report gikan sa Davao del Norte Police Provincial Office nasayran nga nahitabo ang aksidente pasado alas 6:00 sa gabii didto sa maong dapit, samtang nag-drive sa iyang Honda Wave nga motor si Pentaca nga dunay plate number 9674-LI angkas niya si Saramosing.

Pag-abot sa maong dapit mibangga ang motor sa usa ka biseklita nga gidrayban sa biktimang si Melijor.

Tungod sa impak nabalintong ang duha ka mga sakyanan resulta sa pagkahiagum og mga pangos ug bun-og sa kalawasan sa tulo ka mga biktima.

Gipangdala sa Kapalong District Hospital ang mga biktima apan gibalhin sa Davao Regional Hospital sa siyudad sa Tagum tungod sa grabing samad nga ilahang nahiaguman.

Kapulisan sa lungsod sa Kapalong mihimo na og dugang imbistigasyon sa maong hitabo. (Marvin Pineda)