USA ka bunkhouse sa usa ka furniture house didto sa Purok Equira, Barangay Poblacion, lungsod sa Maragusan, Comval Province, naugdaw niadtong Lunes sa buntag.

Sa report gikan sa Comval Province Police Provincial Office nasayran nga pasado alas 9:00 sa buntag, naugdaw ang bunkhouse sa Anino Furniture

Shop nga gipanag-iyahan sa usa ka Eutiquiano Anino didto sa maong lugar.

Ang sunog gikataho nga nanukad sa lawak nga gipuy-an sa mga trabahante sa maong shop nga sila Crispin Badiang, Renante Mauri, Ermi Tuba, Dennis Caberos, Ricky Quitante, ug si Dodong Mauri.

Paspas nga mikuyanap ang kayo sanglit gama sa light materials ang maong shop.

Tungod sa abtik sa pagresponde sa mga sakop sa Maragusan Municipal Fire Station daling napalong ang kayo ug pasado alas 9:20 na sa buntag gideklarang fire out ang dapit.

Sa gihimong pakisusi sa mga otoridad gibana-banang miabot og kapin P20-mil nga kantidad sa mga kabtangan ang nahimong danyos sa sunog.

Wa pa sab masuta sa mga otoridad kung unsa ang hinungdan sa maong sunog. (Marvin Pineda)