TULO ka mga tawo na sab ang giutang ang kinabuhi sa wa mailhing mga mamumuno sa tulo ka managlahing pagpamusil dinhi sa siyudad sa Davao.

Usa kanila kanhing sakop sa Bureau of Jail Management ang Penology (BJMP) samtang ang usa gikan sa Davao Penal Colony (Dapecol).

Ang kanhi sakop sa BJMP mao si Allan Saquilayan, 40, minyo ug nagpuyo sa Small Tacunan, Barangay Tacunan, distrito sa Tugbok, ning siyudad.

Si Saquilayan gipusil sa wa mailhing tawo sa alas 2:20 kagahapon sa kaadlawon didto sa kanto Quirino Avenue ug Magallanes, sigun sa imbestigasyon ni Senior Police Officer 2 Nelson Ladua sa San Pedro Police Station.

Matud ni Ladua sa iyang spot report nga ang biktima nagtindog lamang didto sa nahisgutang lugar apan kalit siyang gipusil sa usa ka tawo nga nagsul-ob og maong nga pantalon.

Si Saquilayan naigo sa nagkadaiyang parte sa lawas mao nga gidala siya didto sa Southern Philippines Medical Center (SPMC) apan gideklara siya sa mga doktor nga dead on arrival sa maong tambalanan.

Nakuha sa kapulisan ang duha ka baseyo sa .45 kalibre nga pistola nga maoy gigamit sa mamumuno.

Nasayran nga nalingaw ang biktima sa duwang billiard didto sa nahitaboan sa krimen sa wa pa nahitabo ang pagpusil kaniya.

Si Helario Saquilayan, amahan sa biktima, naghangyo sa kapulisan nga ilusad ang lawom nga imbestigasyon aron mahatagan og hustisya ang kamatayon sa iyang anak.

Mga kabanay sa biktima nagbutyag nga wa sila masayud kung unsa ang hinungdan nganong gipatay ang biktima sanglit buotan ug hilumon kaayo si Saquilayan.

Dihang gipakisayran kung unsa ang hinungdan nga mipahawa ang biktima sa BJMP, sila nagbutyag nga wa sab sila masayud sanglit wa sila gipahibalo sa biktima.

Samtang ang biktima kinsa gikan sa Dapecol mao si Ramil Manulat, 35, minyo, dispatser ug nagpuyo sa Barangay Bago Aplaya, ning siyudad.

Si Manulat gipusil sa alas 8:00 pasado ang takna sa buntag kagahapon samtang nanawag og pasahero didto sa Crossing Gulf View Executive Homes, Barangay Bago Aplaya.

Ang biktima nakaangkon og samad pinusilan sa iyang ulo dihang gipusil sa usa sa duha ka mga tawo nga nagsakay og motorsiklo.

Ang igsuon sa biktima nga naninda sab sa maong lugar nagbutyag nga usa ka tawo ang iyang nakita nga nagtindog duol sa nahimutangan sa biktima ang mipusil sa iyang iguson gamit ang .45 kalibre nga pistola.

Nasayran nga nabilanggo na ang biktima sa Dapecol tungod sa kasong paghupot og marijuana ug siya nakagawas sa prisohan niadtong Pebrero 2010.

Gawas kang Manulat nga gipusil didto sa Gulf View Executive Homes, gipusil sab didto sa maong dapit si Harold Fernandez, alyas Cocoy, 40, way trabaho ug nagpuyo sa Sesame Street, Barangay Matina Crossing.

Si Fernandez gipusil sa wa mailhing mamumuno sa alas 12:30 sa udto niadtong Martes samtang naglakaw didto sa Lake Sebu Street, Gulf View Executive Homes.

Mga nakasaksi nagbutyag nga nagtabon og pula nga face towel ang mipusil sa biktima kinsa naigo sa iyang walang ulo ug tuong dughan gamit ang .45 kalibre nga pistola.

Mga biktima gihaya karon sa managlahing punerarya dinhi sa dakbayan samtang gihimo ang makuting imbestigasyon sa kapulisan.

"I already instructed the chief of police of Talomo and San Pedro Police Stations to fast track the investigation," ni Davao City Police Office (DCPO) director Rene Aspera dihang nahinabi kagahapon sa Sun.Star Davao Superbalita.

Ang maong opisyal nanawagan ngadto sa mga nakasaksi nga motabang paghatag og impormasyon sa kapulisan aron daling masulbad ang nahisgutang krimen.

Mga mamumuno way kahadlok nga masikop sa checkpoint nga gimuntar aron ipatuman ang Comelec gun ban. (Alger Dura)