NILANDING sa balay tambalanan ang usa ka mabdos human nabanggaan sa prime mover truck niadtong Martes mga alas 10:30 sa buntag sa Barangay Inolugan, lungsod sa El Salvador, Misamis Oriental.

Giila ang biktima nga mao si Maricel Agbu, hingkod ang edad, sa susamang dapit.

Gibutyag sa bana sa biktima nga nitabok sa kalsada ang iyang asawa aron unta mopalit og sud-an apan wala namatikdan sa biktima nga misunod ang gamay nga anak niini.

Gilikayan sa prime mover ang bata ug si Agbu ang nasapon sa trak hinungdan sa pagkadumbol ug pagkabunal sa semento.

Bun-og ug pangos sa laing-laing parte sa lawas ang naangkon niini.

Nireklamo ang biktima nga gibati siya og kasakit sa iyang tiyan hinungdan nga dihang gidala sa Northern Mindanao Medical Center (NMMC) ning siyudad sa Cagayan de Oro, gibalhin sa OB emergency room aron pagsuta kung unsa nay kahimtang sa bata nga anaa sab sa tiyan niini.

Ang kapolisan sa El Salvador Police Station niingon nga nakasibat ang driver sa prime mover tungod kay human sa pagkabangga, wala kini mihunong ug padayon sa pagpadagan.

Hinuon samtang giatiman sa mga doctor ang biktima sa balay tambalanan, ang kapolisan padayon pa usab sa pag-ila sa driver nga mibangga aron tukmang mapasakaan og kaso. (SVB)