NAKABSAN gyod sa kinabuhi ang usa ka lalaki human nahulog sa lubi niadtong Martes mga alas 5:00 sa hapon didto sa lungsod sa Magsaysay, Misamis Oriental.

Giila ang biktima nga mao si Jerome Ninando, 23, ulitawo, sa susamang dapit, kinsa taod-taod na nga nagtrabaho isip tigsaka og lubi sa dapit.

Sa pakighinabi sa Sun.Star Superbalita ngadto kang Jenelyn, usa sa paryente sa biktima gibutyag niini nga nagkuha lamang og butong ang biktima dihang nadigyas tungod sa kadanlog hinungdan sa iyang pagkahulog.

Nabunal ang likod sa biktima sa laing punoan sa kahoy hinungdan nga wala kini makalihok ug pipila ka minuto gibati og kasakit sa tibuok kalawasan ang biktima hinungdan nga ang pamilya niini dali nga nitawag og ambulansya ug deretsong gidala ang biktima sa Northern Mindanao Medical Center (NMMC) ning siyudad sa Cagayan de Oro.

Gani natabang pa sulod sa emergency room apan pipila ka oras ang nilabay wala naagwanta sa biktima ug nakabsan gyod sa iyang kinabuhi.

Matud ni Jenelyn nga buotan nga tawo ug musugot kanunay kung suguon si Jerome hinungdan nga gibati ug kaguol ang ilang sakop sa pamilya sa pagkawala niini. Gani giingong minyuonon na ang biktima sunod tuig sa uyab niini.

Sa pagsulat ning balita, natigayong dalhon sa lungsod sa Magsaysay ang patayng lawas sa biktima. (Stephanie V. Berganio)