MOTAMBONG ang kinatibuk-ang puwersa sa bag-uhay lang nga nakampiyon sa 2010 Cebu Schools Athletic Foundation Inc. (Cesafi) nga mao ang University of Cebu (UC) Webmasters sa Sports Communicators Oraganization of the Philippines (Scoop) forum karong alas 11:30 sa buntag sa Baseline Restaurant.

Ang Webmasters, nga ningkulit og kasaysayan pinaagi sa pagputol sa siyam ka mga tuig nga dominasyon sa University of the Visayas (UV) Green Lancers sa Cesafi, pangulohan sa ilang higanteng si 6’10” Junmar Fajardo.

Ang lumad nga taga Pinamungajan, Cebu maoy labing hait nga hinagiban sa Webmasters sa ilang pagbuntog sa Green Lancers.

Gawas kang Fajardo, ang ubang mga sinaligan sa Webmasters mao sila si Kelvin Juliane, Edward Pao, Robinson Mohammad, Brian Heruela, ug Luigi Bercede.

Sa kasamtangan, ang Webmasters ni coach Rhoel Gomez nagpreparar alang sa umaabot nga Philippine Collegiate Champions League (PCCL) Sweet 16 diin kauban nila ang Green Lancers isip segurado nang mga representante sa Sugbo.

Ang SCOOP forum isalida sa Cebu Catholic Television Network (CCTN) Channel 47 pinaagi sa delayed telecast karong alas 10:00 sa gabii.