USA ka adlaw human sa negatibong komentaryo ni Top Rank boss Bob Arum kabahin sa preparasyon ni pound-for-pound champion Manny Pacquiao, si trainer Freddie Roach mibawi pinaagi sa pagpabuhagay og positibong mensahe.

Nagkanayon si Roach nga nahibalik na ang kaabtik ni Pacquiao human nagpaubos og pipila ka pounds ang Pambansang Kamao sa Pilipinas sa miaging adlaw.

Gani laing panahom ang gibuhian ni Roach ug matod niya nga ang magpatikangkang ni Mexican Antonio Margarito karong Nobiyembre 13 sa Dallas Cowboys Stadium mao ang tuo nga kumo sa walhon nga si Pacquiao.

Nagkanayon si Roach nga niumento gyud og maayo ang kakusog sa tuong kumo ni Pacquiao.

“I really believe it will be the right…it’s so strong now,” matod sa Hall of Famer coach sa interbyu sa ABS-CBN.

Gipasabot ni Roach nga tungod kay walhon man si Pacquiao, hayan ang tuong kumo niini duol gyud kaayo sa iyang kontra hinungdan nga lisod kining mabantayan.

Sa laing interbyu, si Arum, kinsa miingon nga mihinay gyud si Pacquiao dihang iya kining gitan-aw nga nag-ensayo niadtong Sabado, miuyon ni Roach nga nibalik na ang kaabtik sa kongresista sa Sarangani Province.

“He looked much better today than he did on Saturday. What I saw today really gives me, as Manny’s promoter, a lot more confidence because I love the way he was using his right hand,” asoy ni Arum.

Napulo ka rounds ang gisagubang ni Pacquiao niadtong Lunes, upat batok kang Glen Tapia, upat sab batok kang British world champion Amir Khan, ug duha batok kang Michael Medina.

Nagkanayon si conditioning coach Alex Ariza nga ang pagsaka sa timbang ni Pacquiao mao gyud ang nakapahinay niini.

“Manny’s getting bigger, I think he’s starting to be a bit worried he’s

getting too big, so right now, I’m gonna focus on his speed and get him faster,” matod ni Ariza, kinsa miasoy nga niubos na karon sa 148 pounds si Pacquiao.

Gitataw ni Roach nga bisan sa 151 catchweight ang away, dili gyud niya tugtan nga molapas sa 150 si Pacquiao aron dili mawagtang ang kaabtik niini.