SA gihimo ni Cebu City Mayor Mike Rama sa pagpapanumpa sa tanang mga midaog nga mga barangay officials sa Cebu City Hall uban ang pasalig nga ubos karon sa landong sa iyang administrasyon, ang tanang mga barangay lakip na ang tua mahisakop sa oposisyon ang angayon na sa paghatag og ayuda sa pundo sa kagamhanan sa dakbayan sa Sugbo kay maoy iyang pagtoo nga obligasyon sa gobyerno ang pagserbisyo sa publiko ug dili makiangayon ang pagkompromiso ning maong nag-unang katungdanan tungod sa pagpamulitika.
Si kanhi mayor Alvin Garcia nga atong nahinabi sa Tulumanong Alagad sa DyRF Radyo Fuerza nahimangud pagmaayo ning maong gipakitang desisyon ni Rama gani siya mihagit sa bag-ong Mayor nga barugan niini ang iyang nakitang mas makaayo sa iyang mga konstituwente ug dili na magpagawong pa sa kanhiay niining giilang amo sa partido.
Sa iyang bahin, wa makapugong si Kongresista Tomas Osmeña sa pagpabuhagay sa kahanginan sa iyang pagmahay sa gihimo sa iyang tinuboy nga si Mayor Mike Rama.
Kay niya pa, hataas ng panahon nga wala na sila magka-estorya ug dili lamang silang mga kongresista kon dili apil na usab ang mga konsehales ang wala na gikonsulta pa sa Mayor sa iyang mga desisyon. Nagtuo ang kongresista nga mamahimong ipadangat ang ayuda ug serbisyo sa katawhan nga wala na kinahanglana pa ang pagpaagi niini sa ilang mga kaatbang. Mas gikapungot usab ni Tomas ang pagpalagpot nila ni Paul Labra ug George Ylanan sa kapulisan ning atong dakbayan nga niya pa dako kaayo og gikatabang sa milabayng dakong giyera batok sa kriminalidad ug apil pang gi-abolish ang BIN (Barangay Intelligence Network).
Sa iyang bahin, si kanhi senador Sonny Osmena ang wala na mahibulong pa ning maong migawas nga isyu kay niya pa, hagbay na niyang napanglantawan ang pagtumaw sa “repeat of history” sa sitwasyon ni Mike ug Tomas sa kaso usab ni Alvin ug Tomas kaniadto.
Taliwa ning tanan, wala hinuon makahigayon si Mayor Rama sa paghatag og katin-awan sa iyang baruganan kay nagpahigayon man kini sa pagpapanumpa sa mga napiling mga barangay officials sa Norte Distrito ning atong dakbayan.
Apan sumada total ning maong nanggawas nga kalambuan mao ang tilimad-on sa nag-umido nga kalayo sa administration political party dinhi sa Cebu City. Kay mismo si Tomas naman ang namasangil kang Mike nga wa na magsubay sa prinsipyo sa ilang partido ang mga gipangbuhat niini. Gani nag changing of guards naman ang mga sinaligang mga adviser ug mga consultant nga maoy nakapaduda kang Tomas nga maghimo na’g iyang kaugalingong bando partido si Mike ug Joy Pesquera.
Laing kulbahinam nga kumbati na usab unya sa pulitika ang mahipatik sa kasaysayan sa Sugbo ug ang pagkatuman o dili niini mag-agad lang unya kung mosukol na ba o dili ang dinaugdaug? Abangan!