SA hingpit nga pagbanos ni Presidenti Benigno Noynoy Aquino III sa renda sa administrasyon, kadaghanan sa atong katawhan ang naglaom nga sa hingpit ato nang matagamtaman ang tinud-anay nga reporma ug kausaban sa atong panggobyerno tungod kay mao may nag-unang prayoridad ug plataporma niini ang pakigbatok sa kagaw sa graft and corruption.

 

Apan ning bag-o, niay migawas nga mga grupo ug personalidad nga nahalinya kaniadto sa administrasyon ni Gloria Macapagal Arroyo ang mihimo ug mga lakang ug panawagan alang sa tinud-anay nga kagahuman sa katawhan.

Ang (S4) kon Solidarity for Sovereignty mideklarar nga bakante ang tanang mga elective positions sa gobyerno kay unconstitutional ang gipahigayong eleksyon niadtong Mayo 10 unya nanawagan sa Armed Forces of the Philippines sa paghimo sa ilang constitutional mandate sa pagsuporta nga ang tinud-anay sa soberentiya kahatagan og katumanan ning atong nasod. Kay nila pa, ang pinaka-unang automated elections sa nasod nga maoy nakapadaog ni Noynoy sa katungdanan unconstitutional kay kini gipahigayon sa usa ka langyaw nga korporasyon nga kwestyunable ang kredibilidad.

Unya tungod sa isyu sa plagiarism sa Korte Suprema nga nila pa usa ka act of dishonesty, kinahanglang mohimo og extreme sacrifice ang mga mahistrado pinaagi sa mass resignation.

Na-monitor usab pag-apil ang gihimo nga pakigtagbo sa mga diskumpyidong mga opisyales sa Armadong kusog sama nilang Rear Admiral Feliciano Angue, General Delfin Bangit nga wa dawata ni Noynoy, kanhi Defense Secretary Gilbert Teodoro ug Moro National Liberation Front leader Nur Missuari.

Kining tanang mga sinyales ug ingrediyente nagbutyag sa nag-umidong kalayo nga gihalingan niining mga personalid nga walay laing katuyuan gawas sa pagpanglawgaw ning atong pangobyerno aron matagbaw ang ilang way kabutangan nga pagkalaog sa gahum.

Si Kongresista Rodulfo Biazon, Chairman sa Committee on National Defense sa dihang atong ekslusibong nahinabi sa Tulumanong Alagad sa DYRF Radyo Fuerza, 1215 Khz AM namahayag nga dili na angayan pang tagdon kining mga tawhana kay mosamot lamang kini sa pagara kon ugaling ilang mabatyagan nga sila gihatagan og importansya. Kay bisan pa sa ilang gihimo nga mga pagpa-ukyab ug pagpatagad, si Biazon nagtoo nga walay ni kusing nga tsansa kining ilang kalihukan kay ang mga tigpasiugda nailhan naman sa tanan unya wa kini makuha nga suporta gikan sa publiko.

Ang nagpabiling hinungdan nganong nagpabiling nag-aginud ang pagligid sa kalamboan ning atong nasod mao ang kagaw sa kahakog sa gahum nga klaro karong misiwil sa buhat sa paguba sa pangobyerno bahala nag mag-antos ang kinabag-an, matuman lamang ang ilang kapritso ug kagustohan. Ang nag-umidong kalayo bisan unsa kagamay, angayang atong bantayan kay kini mangita lamang ug kahigayunan aron lamyon kitang tanan.