OKEY, migimaw na ang gamay nga kahayag sa imbestigasyon sa National Bureau of Investigation (NBI) kalabot sa nahitabong pagpamomba atol sa bar examination niadtong Septiyembre 26 didto sa Kaulohan.

Ang NBI nakakuha na og video footage nga haduol sa gibuthan sa bomba ug gani nadaklitan pa ang panagway sa giingong maoy miitsa sa bomba.

Niini, mipagawas na ang NBI og cartographic sketch sa gikatahapan ug dako ang ilang pagtuo nga sa umaabot nga mga adlaw mahatagan na gyud og hustisya ang mga nabiktima.

Atol sa hitabo, duha ka law students ang naputlan sa ilang mga bitiis. Usa niini si Raissal Laurel, 25 anyos ug 2nd year sa San Sebastian kansang duha ka bitiis giputol sa mga doktor tungod sa grabing kaangol.

******

Si Jed Carlo Lazaga, law student sa University of San Jose Recoletos, nahikuyog usab sa ilang grupo alang sa bar operations (bar ops) niadtong higayona isip pagsuporta sa ilang mga kaubang nga nikuha sa maong examination.

Taason man tuod ang iyang buhok, adunay ariyos ug may patik nga Akhro sa iyang tuo nga pulso apan gihulagway siya sa iyang mga kauban nga dili bayolenting pagkatawo.

Samtang naglakaw dapit sa Vito Cruz aron pagtan-aw unta sa ilang service bus, sa wa niya damha may mituok kaniya sa likod ug pipila ka kauban niini mibunlot kaniya paingon sa police station ug didto gitabangan siya og sumbag. Worse, gipasanginlan siya nga maoy miitsa sa bomba.

Sa sunod adlaw, nagbansiwag sa mga mantalaan, television ug radio nga siya maoy suspetsado sa pagpamomba.

Poor Lazaga. Angayan usab siyang hatagan og hustisya.