Oliver P. Flores
Sogod, Cebu
MAO pay pag-abot ni Kadyo gikan sa gamayng luna sa iyang uma. Nakalingi siya, wa makadayon pagtikang sa tulo ka ang-ang nga hagdanan sa bulos sa kawayan. May misangpit man god kaniya. Ug sayag ang nawong ni Tikoy nga nagdaling miduol kaniya.
“O, Koy, nganong nia ka man? Wa diay ka mananggot nga espoting ka man?” Gitan-aw ni Kadyo ang gisul-ob ni Tikoy nga higala niyang manananggot sa ilang sityo Katiwkatiw.
Nag-poloshirt kini, nagkarsones ug nagsapatos og goma.
“Gisugo ko lang ang anak kong ulitawo sa pagbanos una nako sa pag-atiman sa akong mga sanggutan. Gikan ko sa ilang Kapitan. Ug ikaw gyud ang akong tuyo karon.”
Nadiyong ang mga mata ni Kadyo nga mitutok sa higala.
“Kay ngano man diay, Koy? May sa’a ba ko nga husayon sa barangay hall? Unsa mang salaa, Koy” Sunudsunod ang pangutana ni Kadyo. Gikulbaan siya.
“Wa kay sala, Kadyo, uy!” Mikatawa si Tikoy. “Nalimot ka ba nga eleksiyon na sa barangay ugma. Nia, o, dawata ning bayinte pesos. Kuwarta ni sa atong kapitan.”
Nag-ukon-ukon sa pagdawat si Kadyo.
“Sige na, Kadyo. Dawata na ning kuwarta.” Gidudho ni Tikoy kang Kadyo ang tibuok bayinte pesos.
“Di lang ko, Koy. Nasayod ka na bitaw sa akong baruganan. Sukad pa kaniadto, wa gyud ko makagusto anang atong barangay kapitan karon. Mapahimuslanon sa gahom. Kuwartahan man god maong nakadaog sa miaging eleksyon. Namalit og boto bisag supak kini sa balaod.”
“Sus, dawata lang god ni.” Unya may gihunghong si Tikoy kang Kadyo.
“Unsa god diay!” Miyanguyango si Kadyo.
“Nasayod ko sa imong baruganan, Kadyo. Di mapalit og kuwarta ang imong katungod bisag kabos ka.”
“Mobotar ko sa kandidato nga gituohan kong magtinarong sa pagserbisyo nato ug sa atong komunidad. Pero dawaton ko nang kuwarta sa kapitan.”
NAHUMAN ang eleksyon sa barangay. Puwerteng sukoa sa barangay kapitan. Gipatawag niya ang tanan niyang mga lider kon nganong napilde siya nga namayad man unta siya mga botante. Pero way bisan usa ka lider ang mipatalinghog kaniya. Way mitungha.
Nagkatawa si Tikoy. Nagpahipi lang siya sa gawas sa bungalow nga balay sa kapitan.
Nalingaw man siya nga nagtan-aw sa kapitan nga nangasaba sa mga suluguon.
Nagdali nga miadto si Tikoy kang Kadyo. Naatol nga diha sa iyang balay si Kadyo.
“Unsa na, Kadyo, nakabawos gyud ta sa kapitan. Hapit intawon maghuramentado ang
kapitan tungod sa iyang pagkapilde. Gilubong god siya sa botos sa iyang kontra.”
Nagkatawa si Tikoy.
“Mao ni bayad sa iyang pagka way ayong kapitan sa barangay, Koy. Abi siya man ang atong kapitan, ug nabayran niya ang mga botante kaniadto, wa na lang niya atimana ang mga problema sa atong komunidad. Nagpasugal nuon. May bingo, hantak, tong-its, tigbakay ug estrikto pa gyud kayo. Nagsalig kay suportado sa atong mayor.”
“Siyarog di siya mahigmata sa nahitabo kaniya. Kaming mga lider niya nagkasabot nga ipakopras sa mga botante ang iyang kuwarta ug adto mobotar sa iyang kontra aron makabayad siya sa iyang pagpasagad sa iyang katungdanan sa barangay.”
Nagpahiyumay si Kadyo ug si Tikoy. Unya nag-inom sila og tuba nga bag-ong dawat. Malipayon sila sa ilang kadaugan. (KATAPUSAN)