MANDAUE City Hall nisaad nga pahamtangan og silot kon si kinsa man ang  kawani nga nagbinuang sa dukomento sa monthly allowance sa City Hall alang sa Mandaue City Police Office (MCPO) nga maoy nakaingon sa pagkalangan sa allowance sa usa ka pulis.

Mopahigayon og lawom nga imbestigasyon ang City Hall aron matino kon si kinsa ang responsabli sa pagpapas sa ngan sa usa ka pulis nga maoy nakaingon nga nalangan ang allowance sa kapulisan.

Una niini, ang allowance sa mga pulis nga tag P1,000 sa buwan sa Septiyembre gikan sa City Hall nalangan tungod kay gipapas ang ngan ni SPO3 Eliezar Raromines, sakop sa traffic division.

 

Nagtuo siya nga kini may kalabotan sa iyang hingusog nga pagpanakop sa mga

motoristang wa mag-helmet diin daghan sa taga city hall ang iyang nadakpan.

Si City Administrator Briccio Boholst nibutyag nga mohimo siyag lawom nga imbestigasyon labot sa maong hitabo.

Samtang nisaad siya nga mag-atubang og silot kon mamatud-an nga adunay kawani sa City Hall nga nagbinuang sa maong mga dukomento.

Nasayran ang mga pulis nga nadistino sa traffic division magdawat sa City Hall og P1,300.