MITUMAW ang mga report nga aduna nay bag-ong itudlo ang Cebu City Government nga bag-ong medical director sa Cebu City Medical Center (CCMC).
Ang report nagagikan sa usa sa mga consultant sa mayor kinsa niingon nga ang hepe sa Department of Veterinary Medicine and Fisheries (DVMF) nga si Dr. Alice Utlang maoy ihulip sa pwesto nga mabiyaan ni Dr. Myrna Go.
Apan si Cebu City Mayor Michael Rama nagkanayon nga ang position isip medical director sa CCMC di mamahimong ihikaw ngadto sa mga emplayado ug department head sa Cebu City Hall.
Siya nidugang nga ang gikinahanglan gyud karon sa CCMC mao ang tawo nga adunay katakos sa pagdumala sa tambalanan bisan paman kon di siya doctor.
Hinuon gipasabot ni Rama nga kon adunay doctor sa medisina unya aduna say katakos sa pagdumala, mas labing maayo.
Samtang si Cebu City south district Congressman Tomas R. Osmeña way supak sa maong sugyot sanglit si Dr. Utlang mao may usa sa iyang kanhi department head nga iyang gisaligan panahon sa iyang administrasyon.
Si Utlang nagkanayon sa dihang nahinabi sa Sun.star Superbalita nga kon tinuod man ang maong hugon-hugon makig-estorya siya kang Rama ug magplano kon unsay angay buhaton.
Siya niingon nga kon ang iyang presensya makatabang pagpalambo sa CCMC, di siya mobalibad niini.
Giangkon sa DVMF chief nga lahi ra gyud ang traba-ho sa DVMF ug CCMC. (PAC)