USA ka Joseph Erap Estrada sa siyudad sa Digos subling nagpapili sa pagka-barangay kagawad sa Barangay Zone 2 sa maong siyudad.

Gisundog ni Estrada ang tanang estilo sa pagpangampanya sa kapangalan niya nga si kanhi Presidente Joseph Estrada.

Tuig 2007 sa dihang napili pagka-konsehal si Estrada sa ilang barangay ug karon nagpasubli na sab.

Sa iyang paglibot sa barangay, nagsul-ob siya og wristband ug vest nga kopya kaayo gikan sa iyang gi-idolo nga aktor ug kanhi presidente nga si Jose Marcelo Ejercito sa tinuod nga kinabuhi.

Gisuhid niya ang kabalayan aron ikampanya ang iyang kaugalingon.

Gipasigarbo niini ang iyang hulagway uban sa kanhi pamuno nasud sa dihang nibisita kaniadto sa dakbayan.

Sumala sa ubang botante, mas dali nilang nahinumduman ang ngalan sa maong kandidato gumikan kay kapangan sa aktor. Apan sigon sa kadaghanan nga bisan unsa ang pamaagi sa pagpangampanya sa tanang kandidato, dili ang pagka-ilado maoy basehan sa ilang pagpili og tawong botohan karong Oktubre 25.

Nag-unang gilantaw sa mga botante ang tinud-anay nga pag-serbisyo sa usa ka politiko ngadto kanila.

Didto sa lungsod sa Bansalan, Davao del Sur, daghan sab sa mga kandidato ang wa na magpuyo sa kaugalingon nilang barangay apan nibalik aron magpapili pag-usab.

Usa ka di magpailang botante sa maong lugar nagkanayon nga pipila sa mga nagpasubli og posisyon talagsa ra makita sa barangay sanglit atua magtrabaho sa ubang lugar.

Si Atty. Maria Febes Barlaan, provincial election supervisor sa Commission on Elections, nagkanayon nga nanghinaut na lamang sila nga magmalinawon ang eleksiyon sa lalawigan.

Gihagit sab niini ang mga kandidato nga tinud-on ang panaad nga suportahan ang usa ka malinawong piniliay aron di mahisama niadtong Mayo nga dunay daghang kinabuhi ang nakalas maong probinsiya. (Orlando B. Dinoy)