3 tawo patay sa sunog sa Digos

TULO ka mga tawo ang naapil sa pagkasunog sa duha ka mga balay didto sa siyudad sa Digos.

Sumala sa Bureau of Fire Protection (BFP) nga kalit lang niulbo ang kalayo banda alas 2 sa kaadlawon niadtong Miyerkules didto sa dalang Llanos sa maong siyudad.

Dugang pa sa BFP nga dunay tulo ka mga balay nga nagtapad sa maong dapit, apan duha ra niini ang gilamoy sa kalayo.

Si City Fire Marshall Inspector Gil Andres nag-ila sa tag-iya sa balay nga gipa-abangan ni Karen Presto. Matud ni Andres ang inahang si Rebecca Banac, 50, ug mga anak nga sila Raymund, 16, 4th year high school ug ReyLold, 14, nakit-ang wa nay kinabuhi human naapil sa sunog.

Wa niadtong tungura ang bana ni Rebecca nga si Reynaldo tungod kay didto kini nanarbaho sa dakbayan sa Cotabato samtang ang laing anak nila nga si Raymart atua sab sa dakbayan sa Davao nanarbaho sa usa ka gasoline station.

Sumala sa BFP, pito ka mga pamilya ang nagpuyo sa boarding house ni Presto.

Sa wala pa mahitabo ang sunog, sumala pa, nga usa ka magtiayon, nag-abang sab sa maong balay, nag-away ug paghilabay sa pipila ka minuto kalit lang niulbo ang dakong kalayo nagikan sa lawak sa naglalis.

Gumikan kay karaan ang maong balay, dali kaayong gilamoy sa kalayo. Way bisan usa ka butang ang nakuha sa mga pamilyang nasunogan.

Luwas ang ta-iya sa dos andana nga balay kay nakamata ug tulin nga nakalikay sa miulbo nga kalayo.

Si Senior Fire Officer 1 Paulino Remon, arson investigator, nagkanayon nga electrical short circuit ang ilang inisyal nga nakitang hinungdan sa sunog.

Nidanyos ang sunog og P2.3 milyones.

Mga patayng lawas sa mga biktima gidala sa punerarya samtang mga sakop sa BFP padayon ang pagsusi sa hinungdan sa sunog. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph