ANG kapulisan naningkamot karon nga matumbok ang tinuod nga hinungdan nganong gipusil patay ang tulo ka mga tawo sa sunod-sunod nga insidente dinhi sa siyudad sa Davao.
"Our investigation is ongoing. But I instructed the chief of police of Talomo and San Pedro Police Stations to look all possible angles," ni Davao City Police Office (DCPO) Director Rene Aspera dihang gipakisayran sa Superbalita kagahapon human sa press conference didto sa Task Force Davao.
Si Aspera nagkanayon nga daghan ang angay susihon nga angulo sa kamatayon nila Allan Saquilayan, 40, minyo ug nagpuyo sa Small Tacunan, Barangay Tacunan, distrito sa Tugbok; Ramil Manulat, 35, minyo, dispatser ug nagpuyo sa Barangay Bago Aplaya; ug Harold Fernandez, alyas Cocoy, 40, way trabaho ug nagpuyo sa Sesame Street, Barangay Matina Crossing.
Si Saquilayan, kanhi sakop sa Bureau of Jail Management ang Penology (BJMP), gipusil patay sa alas 2:20 sa kaadlawon niadtong Miyerkules didto sa kanto Quirino Avenue ug Magallanes, ning siyudad.
Si Manulat gipusil sa alas 8:00 pasado ang takna sa buntag kagahapon samtang nanawag og pasahero didto sa Crossing Gulf View Executive Homes, Barangay Bago Aplaya.
Si Fernandez gipusil sa wa mailhing mamumuno sa alas 12:30 sa udto niadtong Martes samtang naglakaw didto sa Lake Sebu Street, Gulf View Executive Homes.
"Maraming anggulo kasi ang dapat nating tingnan bago tayo makapagsabi may involment sa illegal drugs ang motive ng mga criminal. Sa ngayon, hindi pa natin masabi yan," pahayag ni Aspera dihang gipakisayran kung duna bay kalambigitan ang druga mao nga gipatay ang mga biktima.
Miguwa ang katahap suliran sa druga ang hinungdan nganong gipatay ang mga biktima human napatay si Manulat kinsa gikan nabilanggo tungod sa pagpayuhot og marijuana didto sa Davao Penal Colony (Dapecol).
Si Manulat nakagawas sa Dapecol human maserbisyohi ang iyang sentensiya niadtong Pebrero 2010.
Ang kapulisan nagsusi karon sa anggulo nga basin gipatay si Manulat ug Fernandes tungod kay nalambigit sa gidili nga droga, base sa pahayag ni Police Chief Inspector Joselito Loriza, hepe sa Talomo Police Station.
Si Chief Inspector Ceazar Cabuhat, hepe sa San Pedro Police Station, nagbutyag nga ila sab gipalawman ang imbestigasyon sanglit duna silay nadawat nga impormasyon nga nataktak sa trabaho si Saquilayan gikan sa BJMP tungod kay nalambigit sa gidili nga droga.
Ang maong opisyal nagtuo nga kauban sa biktima ang mipatay kaniya tungod kay kanunay magkuyog ang duha sigun sa pahayag sa ilang nakuha nga saksi sa maong krimen.
"Posible na magkasama ang victim at suspect kasi palagi daw nakikita ng ating witness na magkasama ang dalawa. At before siya binaril, nagsuntokan pa ang dalawa. So, malaki ang possibility na magkakilala sila," dihang gipangutana sa mga tigbalita.
Sa pagsuwat ning balita, gipaabot nalang sa kapulisan ang cartographic artist aron himuon ang cartographic sketch sa suspetsado base sa paghulagway sa nakasaksi sa krimen. (AD)