SAMTANG padangaton ang Sangguniang Kabataan ug barangay election, ang mga sakop sa Philippine Drug Enforcement Agency (PDEA) Regional Office 10 padayon sa kampanya batok sa ilegal nga druga.
Niadtong Martes duha ka mga lalaki ang arestado dihang gihimo ang buy-bust operation sa Zone 7, Cabina, Bonbon ning siyudad sa Cagayan de Oro.
Giila ang mga suspek nga mao sila si Romeo Lim, 58, minyo, driver sa dyip ug residente sa dapit. Apil sa nasikop si Eldi Gorres, 34, minyo, mananahi ug residente sa Kauswagan, ning siyudad.
Namaligya og usa ka gamayng paketa sa shabu ang mga suspetsado ngadto sa PDEA agent nga nagsilbing decoy.
Nakuha usab sa ilang posisyon ang usa ka gamayng plastic sachet nga adunay sulod gituohang shabu ug 1 disposable lighter.
Kasamtangan nga gibalhog sa prisuhan ang suspek nga gikatakdang pasakaan og kaso.
Ang mga nakumpiskang mga illegal paraphernalia dalahon sa PNP Crime Laboratory alang sa masusing eksamin. (SVB)