KRITIKAL ang kahimtang sa usa ka lalaki human giayo og luba sa higala ra usab niini niadtong Miyerkules mga alas 11:50 sa gabii sa Puntod ning siyudad sa Cagayan de Oro.

Giila ang biktima nga mao si John Yamber Balase, 20, ulitawo sa susamang dapit.

Gitumbok nga suspetsado ang higala nga naila lamang sa ngalan nga Giovani.

Kalit lang nagkabikil ang duha dihang nagsultihanay ug misangpot sa pagpanglguba. Wala nasayran sa biktima nga aduna diay kini dala nga kutsilyo. Ang kabanay sa biktima wala masayod sa inisidente ug nakurat na lamang pag-ayo sa hitabo.

Naigo ang likod ug hawak sa biktima ug kritikal nga gidala sa Northern Mindanao Medical Center (NMMC) ning siyudad.

Girespondehan sa Police Station 5 (PS5) sa Macabalan ang insidente apan gibutyag sa polis nga pakyas sila tungod kay nakasibat na ang suspetsado.

Samtang laing biktima sa pagpangluba mao si Junrey Grusa, 23, ulitawo, taga Balulang ning siyudad.

Nagbaklay lamang ang biktima pauli sa puloy-anan mga alas 11:45 sa gabii niadtong Miyerkules dihang giatangan sa wala mailang suspetsado ug giluba ang tiyan hinungdan sa pagkayagyag sa tina-i.

Nilanding gihapon sa susamang tambalanan ang biktima ug padayong giobserbahan sa mga doctor samtang gisunod na sa kapolisan sa Police Station 4 (PS4) sa Carmen ang kaso. (SVB)