LIBOAN ka mga polis ang giandam sa Philippine National Police (PNP-10) aron ibutang sa mga polling precinct karong umaabot nga Sangguniang Kabataan ug barangay election.

Gibutyag ni Police Chief Inspector Regina Abanalez dihang nainterbyu sa Sun.Star Superbalita nga ang maong mga polis dad-on sa Lanao del Sur, Bukidnon ug Misamis Oriental.

Gawas sa mga polis nga anaa na daan sa lugar aduna pay idugang kanila gikan sa PNP-10 ug lakip nga mo-deploy sa ilang mga sakop ang 4th Infantry Division (4ID).

Ang maong mga polis ug sundalo ang tahasan pagpatuman sa kahusay ug kalinaw sa lugar diin sila madestino aron malikayan ang kagubot sa gawas ug sulod sa mga polling precinct.

Niadtong Miyerkules gipahigayon ang briefing ug conference sa Comelec ngadto sa mga sakop sa AFP, PNP ug DepEd sa Grand Caprice, Limketkai Center ug nahisgutan ang mga security measure alang sa umaabot nga piliay.

Kung ang AFP ug PNP maoy maghatag og seguridad alang sa kahusay ug kalinaw sa piniliay ang mga magtutudlo usab ang magsilbing Board of Election Teller (BET) dili lamang pag-atiman sa balota apan pag-atiman sa mga botante kung unsay buhaton ug maoy maghatag og giya ngadto sa mga botante.

Samtang ning siyudad sa Cagayan de Oro gihatagan usab og duha ka battalion company aron makatabang og bantaylain-laing presintuhan.

Nanghinaut si Abnalez nga magtinbangay ang katawhan ug makig-coordinate ngadto kanila aron hapsay ug malinawon ang eleksyion karong umaabot nga Lunes. (Stephanie V. Berganio)