NAG-UNA ang siyudad sa Cagayan de Oro sa daghang listahan nga nakasupak sa total Comelec gun ban subay sa piliay sa barangay ug Sangguniang Kabataan election nga gisugdan niadtong Septiyembre 25, 2010.

Si PC/Insp. Regina Abanalez, hepe sa Police Information Office sa Philippine National Police Region 10, nibutyag sa Sun.Star Superbalita nga ang siyudad sa Cagayan ang nag-una sa listahan nga daghan ang nakalapas sa Comelec gun ban.

Nasayran nga moabot ngadto sa 14 ka mga tawo ang nadakpan ning siyudad ug usa niini usa ka polis nga mao si Police Officer 3 Julius Bacocot, kinsa nasikop sa mga operatiba gikan sa City Mobile Group (CMG) ubos ni Police Superintendent Danildo B. Tumanda.

Nagtingkagol ning panahona si Bacocot sa Maharlika Detention Cell human nakuha gikan sa hawak niini ang kalibre .45.

Dunay gikapakita ang maong polis nga papeles ug pagtugot sa paghupot niini apan padayon ang pagpasaka og kaso tungod kay naka-sibilyan lamang kini ug wala naka-uniporme.

Pipila sa mga nasikop ning siyudad ang naglambigit sa illegal ug criminal nga mga kalihokan kinsa posibleng suspetsado sa mga pagpanulis, pagpanguot ug uban pa.

Samtang gibutyag ni Abanalez nga ang Cagayan de Oro gisundan sa Bukidnon diin lima ka mga gun ban violator ang nasikop, tulo gikan sa dakbayan sa Iligan ug Misamis Occidental, duha sa Lanao del Sur ug Misamis Oriental nga maoy labing ubos.

Gipasabot ni Abanalez nga apil na niini sa nasikop ang pipila ka mga sibilyan nga naghupot dili lamang pistola apan mga hait nga hinagiban.

Gihinaot niini nga unta dili na mosaka ang listahan sa mga mingsupak ug unta wala nay mosupak pa niini.

Samtang namatikdan sab sa kapolisan ang pag-ubos sa nakalapas sa Comelec gun ban kon itandi niadtong national election niadtong bulan sa Mayo. (Stephanie V. Berganio)